Երկրպագուներն ու կոլեկցիոներները հնարավորություն կունենան ունենալ Մայքլ Ջեքսոնի նկարները, քանի որ նրա տասնյակ աշխատանքներ կհանվեն աճուրդի, հայտարարել է King’s Auctions-ը:
Օգոստոսի 3-ին աճուրդի կհանվեն հանգուցյալ փոփ աստղի 78 նկարներ։ Յուրաքանչյուր սքեթչ ստորագրել է անձամբ ինքը։
Ջեքսոնը, որը մահացել է 2009 թվականին՝ 50 տարեկանում, ամբողջ կյանքի ընթացքում արվեստի երկրպագու է եղել եւ սկսել է նկարել երիտասարդ տարիքից: Իր ողջ կարիերայի ընթացքում շրջագայելիս Ջեքսոնը հաճախ էր զբաղվում նկարչությամբ, եւ այն դարձել էր հոբբի:
«Նրան ոգեշնչում էին արվեստի բազմաթիվ ժանրեր՝ դասականից եւ ճարտարապետությունից մինչեւ փոփ-արտ եւ նույնիսկ ֆորմալ դիմանկար: Նա նաեւ մեծ սեր ուներ Լոնդոնի եւ բրիտանական ավանդույթների նկատմամբ»,-ասվում է King’s Auctions-ի մամուլի հաղորդագրության մեջ։
Աճուրդն անցկացվում է King-ի Լոս Անջելեսի մասնաճյուղի հետ համատեղ։ Հեռակա եւ առցանց սակարկությունները հասանելի կլինեն LiveAuctioneers-ի միջոցով, իսկ նախնական ցուցադրությունները տեղի կունենան Բեւերլի Հիլզում եւ Լաս Վեգասում:
![](https://azat.tv/wp-content/uploads/2022/09/azattvlogoblack.png)