Չինաստանի արևելքում լաստանավային հաղորդակցությունը դադարեցվել է, իսկ Ճապոնիայում կիրակի չեղարկվել են դասերն ու ավիաչվերթները, քանի որ «Հինամնոր» թայֆունը, որն ամենահզորն է այս տարի, անցել է Թայվանի և Կորեայի կողքով՝ ուղեկցվելով հուժկու քամիներով և հորդառատ անձրևներով, տեղեկացրել է AP-ը։
Շանհայը դադարեցրել է լաստանավային հաղորդակցությունը և գործի դրել ավելի քան 50 000 ոստիկան, որպեսզի օգնի մարդկանց փրկության գործին և տրանսպորտը հեռացնի վտանգավոր գոտիներից։ Արևելյան գործարար կենտրոնը՝ Վենչժոուն, երկուշաբթի կդադարեցնի բոլոր դասերը։
Կանխատեսումների համաձայն՝ «Հինամնորը» աստիճանաբար տեղափոխվում է Արեւելաչինական ծով, քամու արագությունն առավելագույն կայուն է՝ ժամում 175 կլիոմետր/ժամ, վկայում են Հոնկոնգի դիտարանի տվյալները։
Ճապոնիայի հարավային Օկինավա կղզում հայտարարվել է տարհանում, չեղարկվել են ավիաչվերթները։ Սպասվում է, որ թայֆունը ինտենսիվ անձրեւներ կառաջացնի Կորեական թերակղզում, ինչը կհանգեցնի հեղեղումների։
Չինաստանի Ազգային օդերևութաբանական կենտրոնը կիրակի ժամը 10.00-ին թայֆունի մասին դեղին նախազգուշացում է հայտարարել և զգուշացրել է ուժեղ անձրևների մասին հյուսիսարեւելյան Չժեցզյանում, Շանհայում և Թայվանում։
Նավերին հրամայվել է վերադառնալ նավահանգիստ՝ քամուց պաշտպանվելու համար, կենտրոնը նաև մարդկանց կոչ է արել մեծ խմբերով չհավաքվել ինչպես շինություններում, այնպես էլ բաց տարածքներում։
Ճապոնիայում թայֆունն անցել է Օկինավայով և մերձակա կղզիներով՝ առաջ բերելով հորդ անձրեւներ և հուժկու քամիներ, սպառնալով հեղեղումներով և չեղարկելով ավելի քան 100 չվերթ, որոնք կղզին պետք է կապեին գլխավոր հարավային կղզու՝ Կյուսյուի հետ։
Թայվանում Նոր Թայբեյի, Թաոյուանի և Հսինչուի ավելի քան 600 բնակիչ շաբաթ օրը տարհանվել է ապաստարաններ՝ հորդ անձրևի և ուժեղ քամու պատճառով, վկայում են կղզու Կենտրոնական տեղեկատվական գործակալության տվյալները։
Թայֆունն առաջացրել է սողանք Միաոլի գավառում և տապալել մոտ 100 ճանապարհամերձ ծառ։ Շաբաթ օրը չեղարկվել են մոտ 40 ավիաչվերթ և ավելի քան 100 լաստանավային հաղորդակցություն ամբողջ Թայվանում։