Ատոմակայանը Հայաստանի Հանրապետության համար մեծ նշանակություն ունի, լրագրողների հետ զրույցում ասաց Հայաստանի էներգետիկ ենթակառուցվածքների և բնական պաշարների նախարարության, Էներգետիկայի վարչության ատոմային էներգետիկայի բաժնի պետ Արտեմ Պետրոսյանը:
«Ատոմակայանի կանգառից հետո 90-ականներին էներգետիկ ճգնաժամ ունեցանք, որի հետևանքով բնակչությունն առանց էլեկտրաէներգիայի մնաց, Սևանա լճի մակարդակը նվազեց և ատոմակայանի վերագործարկումից հետո հնարավոր եղավ դուրս գալ էներգետիկ ճգնաժամից», – ասաց Պետրոսյանը:
Նա նկատեց, որ ներկայումս շարունակվում են ատոմակայանի շահագործման ժամկետի երկարացման աշխատանքները, և դրանց զուգահեռ նախատեսվում է ապագայում բարձրացնել միջուկային էներգաբլոկի հզորությունը:
«Այսօրվա գործող ռազմավարությամբ նախատեսվում է ավարտել շահագործման ժամկետի երկարաձգման աշխատանքները և ապագայում ունենալ նոր միջուկային էներգաբլոկ՝ մինչև 600 մեգավատ հզորությամբ: Անհրաժեշտ է իրականացնել լրացուցիչ ուսումնասիրություններ և տեսնել՝ ինչ կլինի», – ասաց նա:
Կարևորելով այսօր Երևանում անցկացվող «Հայաստանում ատոմային էներգետիկայի զարգացման հեռանկարները» պանելային քննարկումը՝ Պետրոսյանն ասաց, որ միջոցառումը համախմբել է ոլորտի մասնագետներին, որոնք կքննարկեն ոլորտի զարգացման հնարավոր տարբերակները:
Քննարկումն անցկացվել է ատոմային էներգիայի ոլորտում Հայաստանի և Ռուսաստանի փոխգործակցության շրջանակում «Ռոսատոմ Արևելյան Եվրոպա» և «Ատոմային էլեկտրակայանների շահագործման հայկական գիտահետազոտական ինստիտուտ» ՓԲԸ օժանդակությամբ:
