Ճապոնիայի արդարադատության նախարար Յուսուհիրո Հանասին խիստ նկատողություն է ստացել կառավարությունից իր աշխատանքի մասին վիճելի արտահայտությունների պատճառով, գրել է Kyodo-ն։ Գործակալության տեղեկատվությամբ՝ նախարարը հայտարարել է, որ զբաղվում է «հասարակ աշխատանքով»՝ կնքելով մահապատժի դատավճիռների հրամանները, ինչի պատճառով հայտնվում է ԶԼՄ-ներում՝ լավ աշխատավարձի կամ ընտրողների համակրանքի փոխարեն։
Ինչպես նշվել է, Յուսուհիրո Հանասիի այս խոսքերն աղմուկ են առաջացրել, եւ հնչել են նրա հրաժարականի կոչեր ընդդիմադիր կուսակցությունների կողմից։ Ի պատասխան՝ Ճապոնիայի կառավարությունը նախարարին» խիստ զգուշացում» է հայտարարել եւ պահանջել այսուհետ անզգույշ արտահայտություններ չանել։
Հանասին ինքը հետագայում պաշտոնական ներողություն է խնդրել իր հայտարարությունների համար։ Նա նաեւ նշել է, որ չի պատրաստվում հեռանալ պաշտոնից, չնայած որոշ քաղաքական գործիչների պահանջներին։