Ուղիղ հաղորդագրություն ռեժիսորին
Սըր Փոլ ՄաքՔաթնին հայտարարել է, որ անձամբ կապ է հաստատել ռեժիսոր Սեմ Մենդեսի հետ՝ բողոքելու The Beatles-ի մասին նկարահանվող նոր՝ The Beatles – A Four-Film Cinematic Event քառերգության նկարահանման հրապարակում նկատված տեսողական անհամապատասխանության դեմ: Amy Poehler’s «Good Hang» փոդքաստի ընթացքում երաժիշտը պատմել է, որ տեսնելով Abbey Road-ի հայտնի անցումը վերստեղծող կադրը, նա նկատել է, թե ինչպես է ՄաքՔաթնիի դերակատար Փոլ Մեսկալն ակնհայտորեն կարճահասակ երեւում Ջոն Լենոնի դերակատար Հարիս Դիքինսոնից:
ՄաքՔաթնին շեշտել է, որ իրական կյանքում խմբի անդամները եղել են միեւնույն հասակի, բացառությամբ Ռինգո Սթարի, ով մի փոքր ավելի կարճահասակ էր: NME-ի փոխանցմամբ՝ ՄաքՔաթնին հաղորդագրություն է ուղարկել Մենդեսին՝ գրելով. «Սեմ, ավելի կարճահասա՞կ: Մի արա սա: Դու ասացիր, որ չես անի»: Ռեժիսորը, սակայն, արագ հանգստացրել է երաժշտին՝ բացատրելով, որ տարբերությունը պայմանավորված է զուտ քայլքի տեխնիկայով, և ուղարկել է մեկ այլ լուսանկար, որտեղ դերասանները հավասար հասակ ունեն:
Ֆիլմաշարի մասշտաբն ու թողարկման ժամանակացույցը
Հավակնոտ կինոնախագիծը ստացել է Sony Pictures-ի աջակցությունը և նկարահանվում է Apple Corps-ի ու խմբի ողջ մնացած անդամների լիակատար հավանությամբ, ինչը ստեղծագործական թիմին տրամադրել է երաժշտական իրավունքների հասանելիություն: Սեմ Մենդեսի ղեկավարությամբ նկարահանվող չորս ֆիլմերը կներկայացնեն լեգենդար ռոք խմբի պատմությունը չորս տարբեր տեսանկյուններից: Բացի Մեսկալից և Դիքինսոնից, գլխավոր դերերում հանդես են գալիս Ջոզեֆ Քուինը (Ջորջ Հարիսոն) և Բարի Քեօգանը (Ռինգո Սթարե):
Երկրորդական դերերում նկարահանվում են Սիրշա Ռոնանը, Աննա Սավաին, Էյմի Լու Վուդը և Միա ՄքՔենա-Բրյուսը: BFI Լոնդոնյան կինոփառատոնում պրոդյուսեր Պիպա Հարիսը հաստատել է, որ չորս ֆիլմերն էլ կինովարձույթում կհայտնվեն 2028 թվականի ապրիլին: Նպատակն այն է, որ հանդիսատեսը դրանք դիտի կինոթատրոններում սեղմ ժամկետներում, սակայն ոչ պարտադիր նույն օրը:
Նախկին դժգոհությունները կինոպատկերումներից
Սա առաջին դեպքը չէ, երբ ՄաքՔաթնին դժգոհություն է հայտնում կինոյում իր կերպարի մարմնավորումից: Երաժիշտը հիշել է Սեմ Թեյլոր-Ջոնսոնի 2009 թվականի «Nowhere Boy» ֆիլմը, որտեղ երիտասարդ Ջոն Լենոնին մարմնավորում էր Արոն Թեյլոր-Ջոնսոնը, իսկ Փոլ ՄաքՔաթնիին՝ Թոմաս Բրոդի-Սանգստերը: ՄաքՔաթնին նշել է, որ ֆիլմում Լենոնի կերպարն իրենից մեծ էր երեւում և հաճախ գետնին էր տապալում իրեն, ինչը պատմական իրականությանը չէր համապատասխանում:
Չնայած ռեժիսորի բացատրությանը, թե դա պարզապես գեղարվեստական ֆիլմ է, այլ ոչ թե վավերագրական կինո, ՄաքՔաթնին խոստովանել է, որ չի հաշտվել այդ մոտեցման հետ: Մինչ Մենդեսի նկարահանումները շարունակվում են ամբողջ 2026 թվականի ընթացքում, ուշադրության կենտրոնում են հայտնվել նաև խմբի պատմության այլ անձինք. 1960-ականների ՄաքՔաթնիի ընկերուհի Ջեյն Աշերը հայտարարել է, որ չի պատրաստվում դիտել ֆիլմերը, իսկ նախկին մոդել Փեթի Բոյդը նշել է, որ ստեղծողները կապ չեն հաստատել իր հետ: