Արքայազն Հարին քննարկում է արքայադուստր Դիանայի մասին վավերագրական ֆիլմ նկարահանելու հնարավորությունը

Արքայազն Հարին քննարկում է արքայադուստր Դիանայի մահվան 30-ամյակին նվիրված վավերագրական ֆիլմի նախագիծը, ինչը կարող է հավելյալ լարվածություն առաջացնել Բրիտանիայի թագավորական ընտանիքում։ iNews-ի փոխանցմամբ՝ թեև պաշտոնական հաստատում դեռ չկա, սակայն Հարիին մոտ կանգնած աղբյուրները հաստատել են, որ նման նախաձեռնություն քննարկվում է։

Սպենսերի հուշերի ազդեցությունը

Այս թեման հանրայնացվել է Դիանայի եղբոր՝ Էրլ Սպենսերի նոր հուշագրության՝ «Swan Song: Diana, My Sister»-ի հրապարակումից հետո։ Սպենսերը նշում է, որ Հարին դիմել է իրեն՝ վավերագրական ֆիլմում մասնակցության հարցով, սակայն ինքը հրաժարվել է՝ նախընտրելով սեփական պատմությունը ներկայացնել գրքի միջոցով։ Yahoo News-ը ևս հաստատում է, որ Սասեքսի դուքսը ուսումնասիրում է մոր ժառանգությունը հարգելու տարբեր ուղիներ։

Եղբայրների միջև տարաձայնությունները

Նախագիծը կարող է սրել հարաբերությունները արքայազն Հարիի և նրա եղբոր՝ Ուելսի արքայազն Ուիլյամի միջև։ 2017 թվականին՝ Դիանայի մահվան 20-ամյակի առթիվ, եղբայրները պայմանավորվել էին, որ դա իրենց վերջին հրապարակային խոսքը կլինի մոր մասին։ Ուիլյամի շրջապատը մտավախություն ունի, որ նոր վավերագրական ֆիլմը կարող է խախտել այդ «չգրված» համաձայնությունը։

Հիմնական խնդիրներից մեկն այն է, թե ինչպես կընկալվի նախագիծը, եթե այն իրականացվի Archewell Productions-ի միջոցով և հեռարձակվի Netflix-ով։ Թեև աղբյուրները նշում են, որ Հարին դեռ որոնում է մոր հիշատակը հարգելու ամենաիմաստալից ձևը, եղբայրների միջև առկա անդունդը մնում է խորը։