Ռուսաստանի նախագահ Վլադիմիր Պուտինը անդրադարձել է Ուկրաինայի հակամարտության դադարեցման՝ ԱՄՆ առաջարկած ծրագրին։ Ըստ նրա՝ Ժնևի բանակցությունների արդյունքում որոշվել է խաղաղության ծրագրի 28 կետերը բաժանել չորս մասի։ Պուտինը նշել է, որ Ռուսաստանն ընդհանուր առմամբ համաձայն է այդ կետերի ցանկին, սակայն դրանք պետք է թարգմանվեն «դիվանագիտական լեզվով», քանի որ որոշ կետեր ներկայումս ծիծաղելի են հնչում։ Նա ընդգծել է, որ Ուկրաինայի հարցով խաղաղության ծրագրի յուրաքանչյուր բառ պետք է լուրջ քննարկվի, և Ռուսաստանը տեսնում է, որ ԱՄՆ-ն հաշվի է առնում իր դիրքորոշումը։
Պուտինը նաև անդրադարձել է ռազմական գործողությունների դադարեցման պայմաններին։ Նա հայտարարել է, որ ռազմական գործողությունները կդադարեն միայն այն դեպքում, եթե Ուկրաինայի զինված ուժերը դուրս գան իրենց զբաղեցրած դիրքերից։ Հակառակ դեպքում, ըստ նրա, Ռուսաստանը կշարունակի իր գործողությունները՝ զենքի ուժով։ Նա հավելել է, որ Ռուսաստանի զինված ուժերը շարունակում են առաջխաղացումը, և հոկտեմբերին Ուկրաինայի զինված ուժերը ունեցել են մոտ 47,500 զոհ։ Պուտինը նաև ընդգծել է, որ Ռուսաստանի կողմից Եվրոպայի վրա հարձակվելու հնարավորություն չկա, և նման պնդումները անհեթեթ են։