Հունիսի 7-ին Ազգային ժողովի արտահերթ նիստում ԼՀԿ պատգամավոր Գևորգ Գորգիսյանը իր ելույթի ընքացքում պատմեց երեկ տեղի ունեցած դեպքի մասին: Նրա խոսքով, ոստիկանները ծեծել են քաղաքացու։ Պատգամավորը նշեց, որ հարբած մարդիկ մոտեցել են քաղաքացուն, որ իր վարձակալած տարածքի դռներն էր փակում։ Նրանք կարծել են, որ նա փորձում է ապօրինի մուտք գործել տարածք, ծեծել են նրան, ապա նստեցրել մեքենա, տարել բաժին։
Ոստիկանի փաստաթղթերը քաղաքացուն ցույց տալուց հետո նրանց բաժնում միացել է ևս մի քանի ոստիկան, որոնք նորից ծեծել են քաղաքացուն։ Իսկ ծեծն ավարտվել է այն ժամանակ, երբ մեկ այլ ոստիկան ճանաչել է քաղաքացուն ու հայտնել, որ դա նրա տարածքն է եղել։ Քաղաքացուն, ըստ Գորգիսյանի, ուղղակի բաց են թողել։ Պատմությունն ավարտելուց հետո պատգամավորն ասաց.
«Այսինքն` քաղաքացուն բռնել են, ծեծել են ու բաց են թողել ոչ մի բանի համար։ Ես կարծում եմ, ես պնդում եմ, որ սա չպետք է անհետևանք մնա … ոստիկանապետի ուշադրությունն ենք հրավիրում սրա վրա, և ցավում եմ, որ սևազգեստ մարդկանց դեմ պայքարելու վարչապետի հորդորը ոստիկանությունը այսպես է ընկալել։ Ուզում եմ պարոն Օսիպյանին լսել՝ արդյո՞ք այսպես են ընկալել այդ հորդորը»։
Իմ քայլի պատգամավորներից Նիկոլայ Բաղդասարյանը հերքեց այդ պատմությունը և նշեց, որ ով պատմել է Գորգիսյանին այդ պատմությունը, ստել է։ Բաղդասարյանի խոսքով՝ մարդուն հնարավոր չէ մի անգամ բակում ծեծել, հետո մեքենայի մեջ, հետո էլ ոստիկանության բաժնում։ Նա ասաց, որ ոստիկանությունը սովորաբար մարդկանց ծեծել է բաժնում, որպեսզի դա աննկատ լինի։
Գորգիսյանն էլ արձագանքեց, որ այդ ամենը տեսագրել են ականատեսները, իսկ քաղաքացին էլ քթի կոտրվածք է ստացել, որն ուսումնասիրել են բժշկական կենտրոնում։
