Ըստ Ռուսաստանում մինչև 2035 թվականն ընկած ժամանակաշրջանի համար զբոսաշրջության զարգացման նոր մշակվող ռազմավարության՝ ներդրումների ծավալը դրա իրագործման համար կավելանա երեք անգամ: Այս մասին հայտարարել է Զբոսաշրջության դաշնային գործակալության (Ռոստուրիզմ) ղեկավար Դմիտրի Գորինը, փոխանցում է РИА Новости-ն։
«Հնարավոր չէ ճյուղը պատկերացնել առանց ներդրումների: Մինչև 2035 թվականը զբոսաշրջության զարգացման ռազմավարության սկզբունքային տարբերությունը նախորդներից այն է, որ ներդրումներն ավելանալու են երեք անգամ»,-ընդգծել է փորձագետը՝ հանդես գալով Online Travel յոթերորդ միջազգային խորհրդաժողովում:
Ռոստուրիզմի ներկայացուցչի խոսքով՝ այդ ներդրումները պետք է ուղղվեն անմիջականորեն տուրիստական օբյեկտների՝ ճանապարհների, ենթակառուցվածքի, ծառայությունների զարգացմանը:
Նա նաև պատմել է, որ նոր ռազմավարության մեջ շատ հստակորեն ամրագրվել են զբոսաշրջության բոլոր հիմնական, այդ թվում և գործնական տեսակները: