Սերժ Սարգսյանն ու նրա փեսան, Վատիկանում ՀՀ նախկին դեսպան Միքայել Մինասյանը վերջին շրջանում ակնհայտորեն լարված են: ԱԺ պատգամավոր, «Իմ քայլը» խմբակցության անդամ Հրաչյա Հակոբյանը կարծում է՝ դա պայմանավորված է վտանգի մոտենալով:
Նրա հետ զրույցը ստորև.
– Պարոն Հակոբյան, այսօր բռնության է ենթարկվել ԱԺ փոխնախագահ Ալեն Սիմոնյանը: Նախնական տեղեկություններով՝ միջադեպը սկսվել է «Ադեկվադ» միաբանության համահիմնադիր Արթուր Դանիելյանի կողմից սեռական բնույթի հայհոյանք տալուց հետո: Եվ Սիմոնյանը և Դանիելյանը վնասվածքներ ունեն: Ունե՞ք տեղեկություն կամ կանխատեսո՞ւմ եք՝ ինչով կարող է պայմանավորված լինել այս հարձակումը:
– Շատ տեղեկություններ դեռ չունեմ, խոսել եմ պարոն Սիմոնյանի հետ, հասցրել եմ հարցնել միայն նրա առողջական վիճակի մասին: Ասաց, որ գլխի հատվածում ցավ ունի, բայց ամեն ինչ լավ է: Թե ինչով է պայմանավորված հարձակումը՝ այս պահին չեմ կարող ասել: Համենայնդեպս փողոցում մոտենալ երկրի բարձրաստիճան պաշտոնյային, սեռական բնույթի հայհոյանք տալ, հետո հարվածելը պետք է համարժեք գնահատական ստանա իրավապահ մարմիններից կողմից: Այդ խմբավորումը, այդ հանցագործը պետք է պատասխանատվության ենթարկվի ու կենթարկվի:
– Նախօրեից Ազգային ժողովում իրավիճակը լարված էր, այդ լարվածության կիզակետում նաև Ալեն Սիմոնյանն էր: Երեկ նա իր ելույթում ասաց, որ Լուսավոր Հայաստանի հետ այդ հայտնի լեզվակռիվը կապված է այն բանի հետ, որ նա տվել է Միքայել Մինասյանի անունը: Ինչքանո՞վ այս ամենը կապ ունի ապօրինի գույքի բռնագանձման մասին օրենքի, այդ մասով իրավապահ մարմինների իրականացրած քայլերի հետ:
– Իմ խորին համոզմամբ դա կապ ունի թե՛ ապօրինի գույքի բռնագանձման օրենքի, թե Միշիկի քրգործի հետ, որովհետև ակնհայտորեն այս բոլոր գործողությունները ուղղորդվում են ինչ-որ մի թաքստոցից: Այդ թաքստոցը դեռ իրավապահները կպարզեն՝ որտեղ է, և թաքնված անձին կներկայացնեն դատարան:
– Այսօր նույն Արթուր Դանիելյանը լուր տարածեց, թե իբր Ռուսաստանում ձերբակալել են մի ինքնաթիռ մաքսանենգ սիգարետ. նա ակնարկում էր, թե դուք էիք այդ սիգարետի մատակարարողը: Ձեր հերքման տեքստում ակնարկել էիք, որ Միքայել Մինասյան է կանգնած այդ լուրերի տարածողների հետևում, ինչո՞ւ:
– Ես շարունակում եմ մնալ նույն կարծիքին, որ այդ ամենը ուղղորդվում է կրկին թաքստոցում եղած անձի կողմից: Ինչու հիմա, որովհետև ես երեկ հարցազրույց էի տվել և խոսել էի նրա ֆեյսբուքյան գրառումների մասին: Կարծես թե բավական ցավոտ էր եղել նրա համար այդ հարցազրույցը: Ֆեյսբուքյան գրառումներում նա թաքստոցից համախմբման կոչ է անում տարբեր ուժերի՝ հանուն Հայաստանի բարեկեցության և ապագայի: Ես էլ իմ հարցազրույցում ասել էի, որ եթե այդքան մտահոգ է Հայաստանի ապագայով, թող գա Հայաստան, իր բաժին պատասխանատվությունը կրի՝ եթե մեղավոր ճանաչվի դատարանում, որից հետո համախմբի այդ ուժերին, Հայաստանը դուրս բերի այս իրավիճակից, որ ինչպես ինքն է ասում՝ գնում է դեպի կործանում, հողերը փուլ-փուլ ուզում են հանձնել և այլն: Եթե վստահ է, որ իրենք չեն գողացել, չեն թալանել, որ իրենք արդար ու ազնիվ են՝ թող գա, կանգնի դատարանի առջև և ապացուցի իր արդարությունը և այդ դեպքում ոչ էլ կազատազրկվի: Ահա այս բովանդակությունը ուներ իմ հարցազրույցը, որից հետո, ինչպես տեսանք՝ արձագանքը չուշացավ. նրա էժան թափթփուկների կողմից արժանացա այդ սուտ լուրի տարածմանը, որը, նորից եմ կրկնում, որևէ աղերս չունի իրականության հետ:
– Արթուր Դանիելյա՞նն է այդ լուրի սկզբնաղբյուրը:
– Ժամականագրությունը որ նայում եմ՝ երևի նրա մյուս թիմակիցը՝ Նարեկ Սամսոնյանը: Չնայած՝ մեծ տարբերություն չկա:
– Ձեր վերաբերյալ տարածված տեղեկությունների մասով դատարան դիմել պատրաստվո՞ւմ եք:
– Արդեն խոսել եմ իմ իրավաբան գործընկերների հետ, իրենք ուսումնասիրում են և չեմ բացառում, որ կդիմեմ դատարան:
– Կարծում եք, որ այդ անձանց ետևում կանգնած է Միքայել Մինասյա՞նը:
– Այո, այո:
– Պարոն Հակոբյան, երբ որ այս բոլորը վերագրվում է Միքայել Մինասյանին՝ մի տեսակ անորսալիության տպավորություն է ստեղծվում: Քրեական գործը կա, որով Մինասյանը որպես մեղադրյալ է ներգրավվել փողերի ապօրինի լվացման և այլ հանցանքների մեջ, հետախուզման մեջ է, թատոցից ենթադրաբար հարձակումներ է կազմակերպում, ֆեյսբուքյան գրառումներ պատվիրում, ինչպես դուք ակնարկեցիք: Այդքան դժվա՞ր է նրան հայտնաբերելը: Ի՞նչ է, ի վերջո, լինելու:
– Անկեղծ ասած հերթականությունը չեմ կարող ասել՝ երբ, ինչ գործողություններ տեղի կունենան, բայց այն, որ վերջում նույն ինքը՝ Միշիկը կանգնելու է արդարադատության առաջ, դա վստահեցնում եմ: Եվ բացի այն, որ բանակից թալանածը, ժողովրդից, թոշակառուներից թալանածը, վերադարձվելու է պետությանը և բանակին ու թոշակառուին, նաև պետք է կրեն իրենց կատարած հանցագործությունների համար իրենց բաժին պատասխանատվությունը:
– Հավանաբար հետևում եք UCOM ընկերության շուրջ զարգացումներին: Երեկ Գագիկ Խաչատրյանի որդին հայտարարեց, որ պետական մակարդակով իրենց ճնշում են: Դրան արձագանքեց վարչապետի մամուլի խոսնակը՝ տեղեկացնելով, որ Խաչատրյանն ու նրա որդիները տարիներ շարունակ ղեկավարել են մաֆիոզ համակարգ, կուտակել մի քանի հարյուր միլիոն դոլարի ապօրինի հարստություն, որում, ինչպես և բազմաթիվ այլ ընկերություններում Միքայել Մինասյանը բաժնեմաս ունի: Թերևս առաջին անգամ փեսայի վերաբերյալ հրապարակումները մեկնաբանեց նաև Սերժ Սարգսյանը: Ինչո՞վ եք պայմանավորում նրանց այս ակտիվացումը:
– Ձեր նշած տեղեկություններին հետևում եմ զուտ մամուլի հրապարակումների մակարդակով, չեմ կարող ավելին ասել: Ինչ վերաբերում է Սարգսյանի ու նրա փեսայի ակտիվացմանը՝ իմ խորին համոզմամբ դա պայմանավորված է նրանով, որ ուղղակի վտանգն արդեն մոտեցել է: «Կարգին հաղորդման» մեջ մի էսպիսի միտք կա՝ ասում է՝ մանրից մոտենում են մեր տներին: Մանրից մոտեցել են իրենց տներին, դրա համար էլ իրենք ընկել են այս ցայտնոտի մեջ: Իրար հերթ չտալով գրառումներ են անում ֆեյսբուքում, սրտաճմլիկ, մոդելային լուսանկարների ներքո: Բայց նորից եմ կրկնում՝ դա հոգեվարքի մեջ գտնվողի վարքագիծ է:
– Ինչքան էլ որ իրավապահները մոտենում են, վարչապետը շարունակում է դժգոհ մնալ քրգործերի ընթացքից: Ի՞նչ կհետևի այդ դժգոհությանը: Իրավապահ համակարգում փոփոխություններ սպասվո՞ւմ են:
– Միանշանակ, եթե դժհոգությունները շարունակվեն՝ իմ կարծիքով չի բացառվում, որ կադրային փոփոխություններ լինեն:
Հարցազրույցը` Հայկական ժամանակի:
