ՀՀ կառավարության կողմից մշակված «Գովազդի մասին» օրենքում համապատասխան փոփոխությունների նախագիծն այսօր խորհրդարանն երկրորդ ընթերցմամբ ու ամբողջությամբ նախագիծ է ընդունվել, ըստ որի՝ Հայաստանում շահումով խաղի կամ ինտերնետ շահումով խաղի կամ խաղատան, խաղասրահի կամ տոտալիզատորի կամ դրանց կազմակերպիչների ցանկացած տեսակի գովազդը կարգելվի՝ բացառությամբ սահմանափակ թվով վայրերում ։
Այժմ առցանց խաղեր կազմակերպող ընկերությունները կարող են իրենց գովազդները տեղադրել միայն իրենց կայքերում, գրասենյակներում, խաղասրահների առաջ կամ ներսում, ինչպես նաև Հայաստանի սահմանային անցակետերում ու 4 աստղանի և ավելի բարձր հյուրանոցներում:
Միևնույն ժամանակ, գովազդը պետք է պարունակի նախազգուշացում խաղացողների համար հնարավոր նյութական վնասի մասին և այդ միտքը պետք է շեշտվի ոչ նվազ, քան գովազդի մնացած հատվածը, քանի որ շատ դեպքերում այս հայտարարությունը գովազդներում նշվում էր փոքր շրիֆտով կամ ընթերցվում էր արագացված տեմպով` դժվարացնելով դրա ընկալումը։
Սույն օրենքն ուժի մեջ է մտնում պաշտոնական հրապարակումից վեց ամիս հետո:
