Համաշխարհային առաջնորդներն այսօր հավաքվում են Շվեյցարիայում՝ մասնակցելու Ուկրաինայի հարցով գագաթնաժողովին։
«Ուկրաինայի խաղաղության բանաձև» գագաթնաժողովի նպատակն է ճնշում գործադրել Ռուսաստանի վրա՝ դադարեցնելու ուկրաինական պատերազմը:
Ուկրաինական խաղաղության գագաթնաժողովին կմասնակցի 100 պատվիրակություն, այդ թվում՝ 57 պետությունների և կառավարությունների ղեկավարներ։ Գագթնաժողովը կբացի Շվեյցարիայի նախագահ Վիոլա Ամգերդը, հաղորդել է Շվեյցարիայի կառավարության մամուլի ծառայությունը։ Գագթնաժողովը կազմակերպել է Շվեյցարիան՝ Կիևի նախաձեռնությամբ։
Ուկրաինայի նախագահ Վլադիմիր Զելենսկին երեկ է ժամանել Շվեյցարիա։
«Երկու օր ակտիվ աշխատանք կլինի աշխարհի բոլոր մասերի երկրների, տարբեր ազգերի հետ, որոնք միավորված են Ուկրաինայում արդար և կայուն խաղաղություն բերելու ընդհանուր նպատակի շուրջ», – երեկ նա գրել էր X-ի իր էջում։
Ռուսաստանն այս միջոցառմանը հրավիրված չէ։ Հայկական կողմից գագաթնաժողովին կմասնակցի Անվտանգության խորհրդի քարտուղար Արմեն Գրիգորյանը։
Մոսկվան հայտարարել է, թե այս միջոցառումը «ճանապարհ է դեպի ոչ մի տեղ» և որևէ կերպ չի նպաստի խաղաղության հաստատմանը:
