Սինգապուրի Գերագույն դատարանը Bloomberg լրատվական գործակալությանը և նրա թղթակից Լոու Դե Վեյին պարտավորեցրել է ընդհանուր առմամբ 460,000 սինգապուրյան դոլար (մոտ 356,000 ԱՄՆ դոլար) վճարել երկու նախարարների՝ Ազգային անվտանգության համակարգող նախարար Կ. Շանմուգամին և Աշխատուժի նախարար Տան Սի Լենգին: Դատավոր Օդրի Լիմի կողմից հուլիսի 14-ին հրապարակված վճիռը վերաբերում է 2024 թվականի հոդվածին, որը, ըստ դատարանի, զրպարտչական բնույթ է կրել:
Խնդրո առարկա հոդվածը՝ «Սինգապուրյան առանձնատների գործարքները գնալով ավելի են պատված գաղտնիությամբ» վերնագրով, քննարկել է անշարժ գույքի շուկայում, մասնավորապես՝ բարձրակարգ առանձնատների (Good Class Bungalows) գնումների հետ կապված գործարքները: Դատարանը եզրակացրել է, որ հոդվածը ընթերցողի մոտ տպավորություն է ստեղծել, թե նախարարները իրենց գործարքները կատարել են ոչ թափանցիկ՝ փորձելով խուսափել փողերի լվացման հնարավոր ստուգումներից:
Դատավոր Լիմը յուրաքանչյուր նախարարի համար սահմանել է 170,000 սինգապուրյան դոլար ընդհանուր վնասի փոխհատուցում և 60,000 դոլար՝ սրված հանգամանքների համար: 71-էջանոց վճռում նշվում է, որ հրապարակումը կատարվել է չարամտությամբ, քանի որ հոդվածի կառուցվածքը ընթերցողին ուղղորդել է կեղծ եզրահանգումների։ Դատարանը շեշտել է, որ Bloomberg-ի նման միջազգային հեղինակություն ունեցող լրատվամիջոցի կողմից նախարարներին հանցավոր գործունեության մեջ մեղադրելը լրջորեն վնասել է նրանց հեղինակությանը:
Ի պատասխան վճռի՝ Bloomberg-ի գլխավոր խմբագիր Ջոն Միկլթվեյթը հայտարարել է, որ չնայած հիասթափությանը, ընկերությունը հարգում է դատարանի որոշումը: Նա հավելել է, որ գործակալությունը շարունակում է պաշտպանել իր լրագրողին և համարում է, որ հոդվածը եղել է հանրային կարևորություն ունեցող ճշմարիտ լրագրողական աշխատանք: