Նյու Յորքի Թայմս Սքվերում՝ Բրոդվեյ 1500 հասցեում ընթացող շինարարական աշխատանքները բացահայտել են գովազդային պատմության մի հետաքրքիր մասնիկ։ Շենքի ճակատային հատվածի վերանորոգման ընթացքում հայտնաբերվել է 2001 թվականի Wrigley’s Spearmint գովազդային վահանակը, որը երկար տարիներ թաքնված է եղել ժամանակակից կառուցվածքների հետևում։
Newsweek-ի փոխանցմամբ՝ վահանակը առաջինը նկատել է տեղի բնակիչ Դեյվիդ Լոուսոնը։ Այս գտածոն պատմաբանների համար յուրօրինակ «ժամանակի պարկուճ» է, որը վկայում է Թայմս Սքվերի զարգացման անցումային շրջանի մասին՝ մինչև թվային LED էկրանների համատարած տիրապետությունը։ Պատմաբան Ջեյմս Նևիուսը նշել է, որ 2000-ականների սկիզբը եղել է ավանդական գովազդի ավարտի և նոր տեխնոլոգիաների սկզբնավորման փուլը։
Ըստ Նյու Յորքի քաղաքային պաշտոնական տվյալների՝ Բրոդվեյ 1500 հասցեում ներկայումս իրականացվում են 1,1 միլիոն դոլար արժողությամբ աշխատանքներ, որոնք ներառում են նոր LED վահանակների տեղադրում։ Թեև պարզ չէ, թե արդյոք պատմական գովազդը կպահպանվի, մասնագետները, այդ թվում՝ Fading Ads of New York City գրքի հեղինակ Ֆրենկ Ջամփը, կարծում են, որ նման բացահայտումները հնարավորություն են տալիս հասկանալու քաղաքային գովազդի տեխնոլոգիական էվոլյուցիան։