SpaceX ընկերությունը նոր թիրախային ամսաթիվ է սահմանել իր հսկայական Starship տիեզերանավի Flight 13 փորձնական արձակման համար՝ նշանակելով այն հինգշաբթի՝ 2026 թվականի հուլիսի 23-ին: Ըստ Space.com և Florida Today պարբերականների հրապարակած տվյալների՝ 124,4 մետր բարձրությամբ հրթիռի արձակումը նախատեսված է Հարավային Տեխասում գտնվող SpaceX-ի Starbase տիեզերակայանից՝ 90-րոպեանոց պատուհանի ընթացքում, որը կբացվի տեղական ժամանակով ժամը 17:45-ին (Երևանի ժամանակով՝ հուլիսի 24-ի կեսգիշերից հետո):
Արձակման այս փորձը հաջորդում է հուլիսի 16-ին տեղի ունեցած չեղարկմանը (abort): Այդ օրը հետհաշվարկը կանգնեցվել էր հենց այն պահին, երբ Super Heavy առաջին աստիճանի 33 Raptor շարժիչները սկսել էին գործարկվել: Ինչպես X սոցիալական հարթակում հայտնել էր SpaceX-ի հիմնադիր Իլոն Մասկը, թռիչքի անվտանգությունն ու հուսալիությունն ապահովելու համար որոշվել է ապամոնտաժել և փոխարինել երկու Raptor շարժիչներ: Թեև ընկերությունը սկզբում ծրագրում էր երկրորդ փորձն իրականացնել հուլիսի 20-ին, կիրակի օրը պաշտոնապես հայտարարվեց արձակումը մինչև հինգշաբթի հետաձգելու մասին:
Flight 13-ը կլինի Starship-ի ամենաառաջատար տարբերակի՝ Version 3-ի (V3) երկրորդ փորձարկումը: V3 նախատիպի առաջին թռիչքը տեղի էր ունեցել 2026 թվականի մայիսի 22-ին (Flight 12): Հենց այս մոդելն է նախատեսված NASA-ի Artemis ծրագրի շրջանակներում տիեզերագնացներին Լուսին հասցնելու, ինչպես նաև դեպի Մարս SpaceX-ի առաջին առաքելություններն իրականացնելու համար:
Այս թռիչքի ծրագիրը նման է նախորդ փորձարկմանը. Super Heavy կրող հրթիռը պետք է վերադառնա Երկիր և վայրէջք կատարի Մեքսիկական ծոցում, իսկ տիեզերանավի երկրորդ աստիճանը կուղղվի դեպի Արևմտյան Ավստրալիայի ափեր: Նախորդ թռիչքի ժամանակ երկրորդ աստիճանը հաջողությամբ կատարել էր խնդիրը, սակայն Super Heavy-ն շարժիչների խնդրի պատճառով կոշտ հարվածով բախվել էր ծոցի ջրերին:
Flight 13 առաքելության կարևոր առանձնահատկությունն այն է, որ այն առաջին անգամ տիեզերք կտանի SpaceX-ի նոր սերնդի Starlink V3 համացանցային 20 արբանյակներ: Քանի որ թռիչքն իրականացվում է ենթաուղեծրային հետագծով, այդ արբանյակները երկար չեն մնա տիեզերքում և արձակումից մոտ 20 րոպե անց կվերադառնան ու կայրվեն Երկրի մթնոլորտում: