Եռակի օլիմպիական չեմպիոն Ստեֆանի Ռայսը հայտարարել է իր կարիերայի կտրուկ շրջադարձի մասին՝ հաստատելով, որ հրաժարվել է Դուբայում զբաղեցրած գործադիր տնօրենի (CEO) պաշտոնից։ 38-ամյա նախկին լողորդուհին, ով մեկ տարի բացակայում էր սոցիալական ցանցերից, նշել է, որ այս որոշումը կայացրել է «հոգևոր միջամտության» արդյունքում։
Ռայսը, ով 2014 թվականին ավարտել է պրոֆեսիոնալ մարզական կարիեր կարիերան, վերջին շրջանում ապրում է Դուբայում՝ ամուսնու՝ քրիստոնյա հովիվ Մարկ Լեսիի հետ։ Ըստ մարզուհու հրապարակած տեղեկատվության, նա կորպորատիվ ոլորտում իր առաջին աշխատանքային պաշտոնը ստացել էր տնօրենի մակարդակով, սակայն ութ ամիս անց նրան առաջարկել էին գլխավորել ընկերությունը։
«Երբ ինձ առաջարկեցին դառնալ գործադիր տնօրեն, ես շատ ոգևորվեցի, քանի որ դա իմ կարիերայի նպատակներից էր։ Սակայն Աստված այլ ծրագրեր ուներ», – գրել է Ռայսը։ Նրա խոսքով՝ կորպորատիվ աշխարհի ծանրաբեռնվածությունը խոչընդոտում էր իր հավատքի և ընտանեկան կյանքի զարգացմանը։ Նա նշել է, որ հրաժարականի նամակը գրելիս հստակություն է զգացել՝ գիտակցելով, որ պետք է կենտրոնանա հոգևոր արժեքների վրա։
Չնայած այն հանգամանքին, որ Ռայսը Քվինսլենդի համալսարանում ստացել է MBA աստիճան և երկար տարիներ ինքնուրույն կառավարել է իր բիզնես նախագծերը, նա ներկայումս «պաշտոնապես գործազուրկ է»։ Մարզուհին, ով 2009 թվականին արժանացել է Ավստրալիայի շքանշանի, խոստովանել է, որ ապագայի անորոշությունը որոշակի դժվարություններ է ստեղծում, սակայն ինքը վստահ է իր ընտրության մեջ։