Tesla ընկերության ղեկավար Իլոն Մասկը հայտնել է, որ ընկերությունը դադարեցնում է էլեկտրոմոբիլների վաճառքը բիթքոյն կրիպտոարժույթով։
Մասկն այս որոշումը հիմնավորել է՝ բիթքոյնի ստացման ձևի վնասակարությամբ։ Նա նշել է, որ դրա մայնինգի համար կիրառվում է հանածո վառելիք, հատկապես ածխի տեսքով, ինչը շրջակա միջավայրին շատ մեծ վնաս է հասցնում՝ արտանետումների հետևանքով։
Հիշեցնենք, որ ավելի վաղ ընկերությունը հայտարարություն էր տարածել, որ սկսում է Tesla-ների վաճառք իրականացնել նաև բիթքոյնով ու դրա համար ձեռք էր բերել բիթքոյններ։ Վերջին որոշումից հետո, սակայն, ընկերությունը չի վաճառելու իր բիթքոյնները, բայց չի էլ օգտագործելու և սպասելու է մինչև դրա մայնինգը սկսվի իրականացվել այլ էներգետիկ աղբյուրներից ստացված էներգիայի միջոցով։
Հատկանշական է նաև, որ օրերս Մասկն իր Twitter-ի էջում հարցում էր անցկացրել ու հետաքրքրվել էր, արդյո՞ք մարդիկ ցանկանում են, որ Tesla-ն սկսի Dogecoin կրիպտոարժույթն ընդունել (այսինքն՝ դրանով վաճառքներ իրականացնել)։ Հարցմանն այս պահի դրությամբ մոտ 4 միլիոն մարդ է մասնակցել, որոնց 78 տոկոսից ավելին կողմ է քվեարկել։ Հետաքրքիր է․ կանցնի՞ Tesla-ն Doge-ով վաճառքների՝ բիթքոյնի փոխարեն, թե՞ դեռ կսպասի։
Tesla & Bitcoin pic.twitter.com/YSswJmVZhP
— Elon Musk (@elonmusk) May 12, 2021
Do you want Tesla to accept Doge?
— Elon Musk (@elonmusk) May 11, 2021