ԱՄՆ նախագահ Դոնալդ Թրամփը հայտարարել է 2027 թվականի հունվարի 1-ից Կանադայից ներկրվող բոլոր մեքենաների, բեռնատարների, ավտոպահեստամասերի և պողպատի համար նոր՝ 50 տոկոսանոց մաքսատուրք սահմանելու մասին։ Ինչպես հաղորդում է The Guardian պարբերականը, սա երկու հարևան երկրների միջև տնտեսական հարաբերությունների հերթական լուրջ վատթարացումն է։ Թրամփն իր Truth Social սոցիալական ցանցում գրել է, որ Կանադան «տարիներ շարունակ կողոպտել է» Ամերիկայի Միացյալ Նահանգները՝ հավելելով, որ Կանադան իր առևտրի 95%-ն իրականացնում է ԱՄՆ-ի հետ, մինչդեռ ԱՄՆ-ն կանադական շուկայից կախվածություն չունի։
Այս որոշումը հաջորդել է անցած հանգստյան օրերին կողմերի միջև բանակցությունների տապալմանը։ Ըստ առկա տվյալների՝ առաջարկվող համաձայնագրով նախատեսվում էր կանադական մեքենաների մաքսատուրքը 25%-ից նվազեցնել մինչև 15%, իսկ ալյումինի և պողպատի տուրքերը՝ 50%-ից հասցնել 25%-ի։ Սակայն շաբաթ օրը Կանադայի վարչապետ Մարկ Քարնին մերժել էր գործարքը՝ նշելով, որ Վաշինգտոնը «չափազանց շատ բան է պահանջում և շատ քիչ բան առաջարկում»։ Ի պատասխան դրան՝ Թրամփը կրկնապատկել է նախատեսվող սակագները՝ հասցնելով 50%-ի։
Երկուշաբթի օրը Քվեբեկից լրագրողների հետ զրույցում վարչապետ Քարնին հայտարարել է, որ Թրամփի այս քայլն սպասելի էր և հանդիսանում է պատասխան ռեակցիա ԱՄՆ-ի կողմից նախկինում սահմանված «անարդարացի» մաքսատուրքերին։ Քարնին ընդգծել է, որ այս որոշումը կհարվածի նաև ամերիկացի աշխատավորներին Միչիգան, Օհայո, Կենտուկի և Ալաբամա նահանգներում, որոնք կախված են կանադական պատվերներից։ «Մենք նրանց ավտոմեքենաների խոշորագույն գնորդն ենք՝ ավելի մեծ, քան Եվրամիությունը, Ճապոնիան, Կորեան և Միացյալ Թագավորությունը միասին վերցրած»,- նշել է նա։
Կանադայի կառավարության ղեկավարը հավելել է, որ Օտտավան պատրաստ կլինի բանակցությունների սեղան վերադառնալ միայն այն ժամանակ, երբ ամերիկյան կողմը հանդես գա «իրական գործընկերության և կանադական արդյունաբերության նկատմամբ հարգալից վերաբերմունքի» դիրքերից։ Ավելի վաղ Թրամփը 50% մաքսատուրք էր սահմանել կանադական 20 միլիարդ դոլարի արտահանման վրա, այդ թվում՝ էլեկտրոնիկայի և հոկեյի հանդերձանքի համար, ինչին ի պատասխան Քարնին խոստացել էր համարժեք պատասխան տալ։ Ըստ ԱՄՆ առևտրային ներկայացուցչի գրասենյակի տվյալների՝ երկու երկրների միջև տարեկան առևտրաշրջանառությունը կազմում է շուրջ 909 միլիարդ դոլար, որն այժմ լրջագույն սպառնալիքի տակ է հայտնվել։