Սպիտակ տունը նախաձեռնել է հինգերորդ պետական ռազմածովային նավաշինարանի ստեղծման գործընթացը՝ ԱՄՆ ռազմածովային ուժերի սպասարկման կարողությունները մեծացնելու համար: Այս մասին հայտարարել է Կառավարման և բյուջեի գրասենյակի (OMB) տնօրեն Ռասել Վոութը՝ ընդգծելով, որ այս քայլը նախագահ Դոնալդ Թրամփի՝ ԱՄՆ ռազմածովային նավատորմը մինչև 2031 թվականը 450 նավի հասցնելու ռազմավարության առանցքային մասն է:
Վոութն այս մասին հայտնել է «IndoPac 2026» համաժողովի ժամանակ՝ նշելով, որ վարչակազմը վճռական է տրամադրված՝ ապահովելու անհրաժեշտ արդյունաբերական հզորություններ: Ծրագրին աջակցել է նաև ԱՄՆ ռազմածովային ուժերի նախարարի պաշտոնակատար Հանգ Կաոն, որն ընդգծել է Արևմտյան ափին նոր նավաշինարան ունենալու անհրաժեշտությունը՝ սուզանավերի պատրաստվածությունը բարձրացնելու նպատակով: Նախաձեռնության հիմնական նպատակն է կրճատել Չինաստանի ռազմածովային նավատորմի (մոտ 370 նավ) հետ առկա ծավալային տարբերությունը:
Նավաշինության ոլորտում ռեսուրսների արդյունավետ կառավարման համար OMB-ում ստեղծվել է նավաշինության հատուկ գրասենյակ: Վոութի խոսքով՝ այս կառույցը կզբաղվի բյուրոկրատական խոչընդոտների հաղթահարմամբ և ռեսուրսների արագ բաշխմամբ: 2027 ֆինանսական տարվա բյուջեով նավաշինության համար նախատեսվել է 65.8 միլիարդ դոլար:
Ներկայում ԱՄՆ-ն ունի չորս գործող պետական նավաշինարան Վիրջինիա, Մեն, Վաշինգտոն և Հավայան կղզիներում, որոնք արդեն իսկ ընդգրկված են արդիականացման երկարաժամկետ ծրագրերում: Ռազմական նպատակներից բացի, վարչակազմի օրակարգում է նաև առևտրային նավաշինության վերականգնումը: Ռազմավարական և միջազգային հետազոտությունների կենտրոնի (CSIS) տվյալներով՝ ԱՄՆ-ն համաշխարհային առևտրային նավաշինության մեջ ունի ընդամենը 0.1% մասնաբաժին, մինչդեռ Չինաստանը՝ 53%: