Ուգանդայի զինված ուժերի հրամանատարությունը հայտարարել է արքայազն Հարիի հիմնադրած Invictus Games (Աննկունների խաղեր) մարզական մրցաշարից երկրի դուրս գալու մասին՝ որոշումը հիմնավորելով Բուքինգհեմյան պալատի պաշտոնական նամակով, որը Սասեքսի դուքսին և դքսուհուն որակում է որպես «մասնավոր քաղաքացիներ»։
Ինչպես հայտնում է BBC-ն, Ուգանդայի կառավարության խոսնակ Ալան Կասուջան հաստատել է, որ բանակի գլխավոր հրամանատար, գեներալ Մուհոոզի Կաիներուգաբան լիովին իրավասու է որոշելու Ուգանդայի պաշտպանական ուժերի մասնակցությունը միջազգային այս մրցաշարին։ Գեներալն ընդգծել է, որ իր երկիրը չի մասնակցի որևէ նախագծի, որն չունի Մեծ Բրիտանիայի Չարլզ III թագավորի պաշտոնական հավանությունը։
Լորդ-չեմբերլենի նամակը և դիվանագիտական հետևանքները
Ուգանդան մարզական այս նախագծին միացել էր ընդամենը երկու ամիս առաջ՝ դառնալով 26-րդ մասնակից երկիրը։ Որոշման փոփոխության պատճառ է դարձել Լորդ-չեմբերլենի կողմից տարածված ուղեցույց-նամակը, որը պատրաստվել էր թագավորի պահանջով։ Փաստաթղթում նշվում է, որ արքայազն Հարին և Մեգան Մարքլը ներկայացնում են իրենց անձնական նախաձեռնությունները և չեն գործում որպես բրիտանական թագի պաշտոնական ներկայացուցիչներ։
The Independent պարբերականի փոխանցմամբ՝ Սասեքսների թիմին ընդամենը մեկ ժամ առաջ են տեղեկացրել նամակի հրապարակման մասին։ Արքայազն Հարիին մոտ կանգնած աղբյուրները նշել են, որ փաստաթուղթը շրջանառության մեջ է դրվել առանց խորհրդակցությունների, իսկ ստեղծված իրավիճակից տուժելու են միայն վիրավորում ստացած զինվորական մարզիկները։
Կազմակերպիչների արձագանքը և ընտանեկան ենթատեքստը
Invictus Games հիմնադրամը հայտարարել է, որ Ուգանդայի իշխանություններից դուրս գալու մասին պաշտոնական ծանուցում դեռևս չի ստացել և փորձում է պարզաբանումներ ստանալ Կամպալայից։ Թագավորական պալատի աղբյուրները շեշտում են, որ Չարլզ III թագավորը շարունակում է աջակցել վիրավոր վետերաններին օգնող նախագծերին, սակայն պաշտոնական կարգավիճակի հստակեցումը սկզբունքային նշանակություն ունի։
Այս իրադարձությունները տեղի են ունենում այն ֆոնին, երբ Հարին և Մեգանը ԱՄՆ-ում վեց տարի ապրելուց հետո վերադարձել են Մեծ Բրիտանիա և իրենց զավակներին գրանցել տեղի դպրոցներում։ Սակայն YouGov-ի վերջին հարցումների համաձայն՝ բրիտանացիների 51%-ը դեմ է նրանց՝ որպես թագավորական ընտանիքի աշխատող անդամների վերադարձին։