2020 թվականի հունվարի 1-ից ավելի քան 700 անուն ապրանքատեսակներ ոչ ԵԱՏՄ երկրներից Հայաստան ներմուծելու դեպքում մաքսազերծվելու են ավելի բարձր դրույքաչափերով: Այսինքն, հունվարի 1-ից երրորդ երկրներից ներմուծվող այդ ապրանքատեսակների վրա սկսում են տարածվել ԵԱՏՄ մաքսային դրույքաչափերն ամբողջությամբ: Թանկացող ապրանքատեսակների շարքում կան առաջին անհրաժեշտության և լայն սպառման բազմաթիվ ապրանքներ: Ներկայացնում ենք դրանցից մի քանիսը:
Մասնավորապես, բարձրացել են մսի, կաթնամերթքի, ձեթի, հացահատիկի, դեղերի և այլ ապրանքների մաքսատուրքերը:
Ներմուծված մսի, ճարպերի, յուղերի մաքսազերծումը թանկանալու է 3%-ով: Ներմուծված դեղագործական արտադրանքի, դեղամիջոցների, ինչպես նաև դեղերի ստացման համար անհրաժեշտ նյութերի մաքսատուրքերն ավելանալու են 2-4%-ով:
Պարարտանյութերի, հացահատիկի, սերմնացուի, կենդանիների կերերի մաքսատուրքերն ավելանալու են մինչև 4%-ով:
Նոր դրույքաչափերը տարածվելու են նաև շինարարության վրա: Ներմուծվող շինանյութերի մաքսազերծման դրույքաչափերն ավելանալու են 3%-ով:
Կտորեղենի և գործվածքի մաքսատուրքերն ավելանալու են 4-6%-ով:
ԵԱՏՄ անդամ երկիր չհանդիսացող երկրներից ներմուծման դեպքում ապակու մաքսազերծումն ավելանալու է 5-6 տոկոսով, թանկարժեք և կիսաթանկարժեք քարերինը՝ 6 տոկոսով, ջեռուցման կաթսաներ, տուրբիններ, սառնարաններ, սառցարաններ՝ 6-9 տոկոսով։
Աղբյուրը՝ 1in.am