Ոստիկանությունը կառավարության 3-րդ մասնաշենքի մոտից բերման է ենթարկել 111 անձի: «Արմենպրես»-ին այս մասին հայտնեցին ՀՀ ոստիկանության լրատվության և հասարակայնության հետ կապերի վարչությունից:
Ոստիկանությունից նաև հայտնեցին, որ բոլոր քաղաքացիները բերման են ենթարկվել խուլիգանություն կատարելու կասկածանքով:
Մայիսի 30-ին «Դիմադրության» շարժման անդամները Ֆրանսիայի հրապարակից երթով շարժվեցին դեպի ՀՀ կառավարության 3-րդ մասնաշենք: Երթին մասնակցող ընդդիմադիր պատգամավորները ցանկանում էին շենք մտնել, սակայն ոստիկանությունը թույլ չտվեց, ինչից հետո ցուցարարները փորձեցին ճեղքել ոստիկանության կազմած պատը և շենք մտնել: Ցուցարարների և ոստիկանների միջև բախում սկսվեց, որի հետևանքով, ինչպես ավելի ուշ պարզ դարձավ, 4 անձ, որոնցից երկուսը ոստիկան, տեղափոխվել են հիվանդանոց: Այնուհետև ցուցարարները հայտարարեցին, որ իրենց խնդիրը կատարել են և շարունակում են երթը, սակայն երթի որոշ մասնակիցներ վերադարձան Կառավարության 3-րդ մասնաշենք և կրկին փորձեցին ներս մտնել, որից հետո տեղի ունեցավ երկրորդ բախումը ցուցարարների և ոստիկանների միջև:
