WhatsApp մեսենջերի Android-ի բետա տարբերակը նոր գործառույթ է ստացել, որը շատ օգտատերերի կուրախացնի․ այսուհետ մեկ սարքով հնարավոր կլինի միաժամանակ մի քանի օգտահաշիվ օգտագործել։
Ինչպես հայտնում է WABetaInfo կայքը, նորամուծությունը նկատել են WhatsApp Business-ի Android հավելվածի 2.23.13.5 համարով տարբերակում։ Սակայն դեռ հայտնի չէ, թե երբ այն հասանելի կդառնա բոլորին։ Բայց ենթադրվում է, որ մեկ սարքից մի քանի օգտահաշիվ օգտագործելու հնարավորությունը WhatsApp Business-ի բացառիկ ֆունկցիան չի մնա և հետագայում կհայտնվի նաև սովորական WhatsApp Messenger-ում։ Թե երբ այս ֆունկցիան կավելացվի iOS տարբերակին, դեռ տեղեկություններ չկան։
Նոր գործառույթը թույլ կտա նույն սմարթֆոնով օգտագործել WhatsApp-ի անձնական և աշխատանքային օգտահաշիվներ։ Նույն բանն անելու համար օգտատերերն այժմ ստիպված են մեկից ավելի սմարթֆոն ունենալ։
WhatsApp-ը վերջերս ավելացնում է իսկապես օգտակար շատ գործառույթներ: Այսպես, Android-ի և iOS-ի բետա տարբերակներում վերջերս հայտնվեց 60 վայրկյան տևողությամբ տեսահաղորդագրություններ ձայնագրելու և ուղարկելու գործառույթը, ինչպես Telegram մեսենջերում։
WhatsApp-ը վերջերս ներկայացրել է նոր գործառույթ՝ Channels-ը, որը պարզ, հուսալի և կոնֆիդենցիալ միջոց է առանց հավելվածից դուրս գալու մարդկանց և կազմակերպությունների մասին կարևոր նորություններին հետևելու համար:
Վերջերս նաև հնարավոր է դարձել մեսենջերում լուսանկարներ ուղարկել HD որակով, ստեղծել մականուններ ինքներդ ձեզ համար, ինչը կօգնի պարզեցնել առանց հեռախոսահամարի կոնտակտի որոնումը, պաշտպանել անձնական նամակագրությունը գաղտնաբառով կամ կենսաչափական տվյալներով և շատ այլ գործառույթներ:
Մեկ այլ երկար սպասված գործառույթ, որը վերջերս է հայտնվել, արդեն ուղարկված հաղորդագրությունները խմբագրելու հնարավորությունն է: Այնուամենայնիվ, դա կարելի է անել հաղորդագրությունն ուղարկելուց հետո 15 րոպեի ընթացքում:
