Հուլիսի 23-ին ՀՀ աշխատանքի և սոցիալական հարցերի նախարարությունը հաղորդագրություն է տարածել, որում հայտնել է, որ պետությունը շարունակում է աջակցություն տրամադրել այն խնամատար ընտանիքներին, որոնց հոգածության ներքո խնամք և դաստիարակություն են ստանում կյանքի դժվարին իրավիճակում հայտնված երեխաները։
«Ընդհանուր խնամատար ընտանիքներում խնամք ստացող յուրաքանչյուր երեխայի խնամքի դիմաց տրվող ամսական վարձատրությունը կազմվում է նվազագույն ամսական աշխատավարձի չափով (տրամադրվում է նաև երեխայի խնամքի և դաստիարակության համար նախատեսված միջոցներ)։
Մասնագիտացված խնամատար ընտանիքում խնամվող հաշմանդամություն կամ ծանր առողջական խնդիրներ, դաստիարակության դժվարություններ, հոգեկան առողջության կամ վարքի խանգարման խնդիրներ ունեցող, հոգեկան տրավմայի ենթարկված յուրաքանչյուր երեխայի խնամքի և դաստիարակության դիմաց ամսական տրամադրվում է նվազագույն ամսական աշխատավարձի և 30 տոկոս հավելավճարի չափով գումար (տրամադրվում է նաև երեխայի խնամքի և դաստիարակության համար նախատեսված միջոցներ)։
Երեխային խնամելու և դաստիարակելու համար կնքված քաղաքացիաիրավական պայմանագրի շրջանակում մատուցվող ծառայությունների դիմաց եկամուտ ստանալու ժամանակահատվածը հաշվարկվում է որպես աշխատանքային ստաժ:
- Ընտանեկան և սոցնպաստը, նաև հրատապ օգնությունն այսուհետ հնարավոր կլինի ստանալ անկանխիկ
- Նոր մարզագույքը կնպաստի ավելի բարձր արդյունքներ գրանցելուն
Խնամատար ծնող հաշվառվելու նպատակով՝ Հայաստանում մշտապես բնակվող չափահաս քաղաքացիներն անձամբ կամ ներկայացուցչի միջոցով կարող են դիմել իրենց բնակության վայրի մարզպետարան (Երևանում՝ Երևանի քաղաքապետարան)․ անհրաժեշտ փաստաթղթերը ներկայացնելուց հետո կիրականացվի համապատասխան գործընթացը»,- ասված է հաղորդագրության մեջ։
