ՀՀ ԱԺ տարածաշրջանային և եվրասիական ինտեգրման հարցերի ու ֆինանսավարկային և բյուջետային հարցերի մշտական հանձնաժողովների hամատեղ նիստում Միքայել Մելքումյանի և Մանե Թանդիլյանի նախագահությամբ հունիսի 6-ին քննարկվել է «ՀՀ 2018 թ. պետական բյուջեի կատարման մասին» տարեկան հաշվետվությունը:
ՀՀ ֆինանսների նախարար Ատոմ Ջանջուղազյանի խոսքով՝ քանի որ Հայաստանը՝ որպես ԵԱՏՄ անդամ երկիր ունի ընդհանուր մաքսային սահման, ուստի երրրոդ երկրներից ներմուծվող ապրանքների համար ընդհանուր կանոններով տեղի է ունենում մաքսատուրքի բաշխում: Այս տեսանկյունից ՀՀ պետական բյուջեն լրացուցիչ համալրվել է շուրջ 18 մլրդ դրամով:
ՀՀ էկոնոմիկայի նախարար Տիգրան Խաչատրյանը, ներկայացնելով հաշվետու տարում ԵԱՏՄ շրջանակում Հայաստանի կողմից իրականացված աշխատանքները, նշել է, որ 2018 թվականին մեր երկրից ԵԱՏՄ անդամ երկրներ արտահանված ապրանքներն աճել են 20.7 տոկոսով, դրանց 98.9 տոկոսը եղել են ոչ լեռնահանքային ոլորտի արտադրության:
Նախարարի խոսքով՝ մեր երկրի տնտեսության զարգացման հեռանկարների տեսանկյունից ԵԱՏՄ միասնական տնտեսական տարածքը կենսական նշանակություն ունի:
Տիգրան Խաչատրյանը խոսել է ԵԱՏՄ տարածքում ապրանքների և ծառայությունների առանց արգելքների տեղաշարժի խորացման, միասնական բրենդի ձևավորման, երրորդ երկրների հետ առևտրային հարաբերությունների բարելավման, ԵԱՏՄ անդամակցությամբ արտաքին սահմանի վրա կիրառվող մաքսատուրքի միասնական դրույքաչափի, արդյունաբերության ոլորտում համագործակցության հեռանկարների մասին:
ԱԳ նախարար Զոհրաբ Մնացականյանը ներկայացրել է ԵԱՏՄ-ում ԱԳՆ դերակատարությունը՝ ընդգծելով մասնակցությունը կառույցի նիստերին, իրավական փաստաթղթերի զննումը և դրանց համադրելիությունը մեր ներքին օրենսդրության հետ:
Զեկուցողները պատասխանել են պատգամավորների հարցադրումներին, որոնք վերաբերել են միջազգային կազմակերպություններին ՀՀ անդամակցության վարձավճարների ավելացմանը, ներդրումային ծրագրերին, նոր աշխատատեղերի ձևավորմանը, արտահանման շահութաբերությանը, տնտեսվարողների շահերի պաշտպանությանը, երրորդ երկրներից մեքենաների ներկրմանը: