Ռուսաստանի ԱԳՆ խոսնակ Մարիա Զախարովան լիակատար աջակցություն է հայտնել Հայաստանի արտգործնախարար Զոհրաբ Մնացականյանի դիրքորոշմանը՝ կապված Լեհաստանում սեպտեմբերի 1-ին Երկրորդ համաշխարհային պատերազմի մեկնարկի 80-ամյա տարելիցին նվիրված հիշատակի միջոցառումներին հանրապետության պատվիրակության չմասնակցելու հետ:
«Ես տեսել եմ Հայաստանի ԱԳ նախարարի այդ հայտարարությունը և աջակցում եմ այն: Եվ մեր բոլոր գործընկերները աջակցում են այդ հայտարարությանը»,-հայտնել է Զախարովան ամենշաբաթյա ճեպազրույցի ժամանակ:
Նրա խոսքով՝ բազմիցս ընդգծվել է, որ այդ հաղթանակը չի կարելի բաժանել ո՛չ ներկայումս անկախ երկրների միջև, որոնք ժամանակին մտել են Խորհրդային Միության կազմի մեջ, ո՛չ Երկրորդ համաշխարհային պատերազմի դաշնակիցների միջև:
Զախարովան նշել է, որ Ուկրաինան այս հարցում մեկուսի դիրքորոշում ունի՝ հավելելով, որ դա հասկանալի է՝ հաշվի առնելով, թե այնտեղ հիմա ինչպիսի գործընթացներ են ընթանում։
«Բայց եթե խոսենք ԱՊՀ-ի մեջ մտնող երկրների մասին, ապա ինձ թվում է, որ նրանք լիովին համաձայն են հաղթանակը կիսելու, պատմությունը վերաշարադրելու անհնարինության և անթույլատրելիության գաղափարի հետ: Անչափ հաճելի և կարևոր է, որ սա վերաբերում է ոչ միայն հայտարարություններին, այլև կոնկրետ քաղաքականությանը, որն անցկացվում է այդ երկրներում. Դա ե՛ւ հուշարձանների մասին հոգ տանելն է, ե՛ւ վետերանների կազմակերպություններին աջակցությունը, ե՛ւ կլոր սեղանների, համաժողովների կազմակերպումը, գրքերի հրատարակումը»,-ասել է ՌԴ ԱԳՆ ներկայացուցիչը։
Հիշեցնենք, որ Հայաստանի ԱԳ նախարար Զոհրաբ Մնացականյանը, մեկնաբանելով Հայաստանի վարչապետ Նիկոլ Փաշինյանի միջոցառումներին չմասնակցելը, հայտարարել էր, որ Հայրենական մեծ պատերազմի թեման հանրապետության համար անչափ զգայուն և փափկանկատ է: Նախարարի խոսքով՝ որոշումն ընդունվել է ելնելով արտասահմանյան այցերի ծրագրից ներքին քաղաքականության առաջնահերթություններից: Փաշինյանին չեն հրավիրել Երկրորդ համաշխարհային պատերազմի մեկնարկի 80-ամյակին նվիրված միջոցառումներին, բայց սպասվում էր նրա մասնակցությունը Կրինիցայում տնտեսական համաժողովին: Սակայն Հայաստանի վարչապետը հրաժարվեց համաժողովին մասնակցելուց:
ԽՈՐՀՈւՐԴ Է ՏՐՎՈւՄ ԿԱՐԴԱԼ
