Կալանավորվել է Նորք-Մարաշ վարչական շրջանի ղեկավարի տեղակալը

Նոյեմբերի 2-ին ՀՀ քննչական կոմիտեն հայտնել է, որ  Երևան քաղաքի քննչական վարչության ծանր հանցագործությունների քննության բաժնում շարունակվում է Երևան քաղաքի Նորք-Մարաշ վարչական շրջանի ղեկավարի տեղակալի կողմից առերևույթ խարդախության փորձ կատարելու, կաշառք ստանալու դեպքի առթիվ հարուցված քրեական գործի նախաքննությունը:

«Նոյեմբերի 2-ին դատարանը բավարարել է վարչական շրջանի ղեկավարի տեղակալի նկատմամբ որպես խափանման միջոց կալանավորում ընտրելու վերաբերյալ վարույթն իրականացնող մարմնի միջնորդությունը:

Ավելի վաղ Քննչական կոմիտեն տեղեկացրել էր, որ քննվող քրեական գործով ձեռնարկված քննչական և դատավարական այլ գործողությունների, ինչպես նաև ՀՀ ԱԱԾ աշխատակիցների հետ համատեղ իրականացված միջոցառումների արդյունքում պարզվել էին դեպքի՝ էական նշանակություն ունեցող մի շարք հանգամանքներ:

• Հայտնի է Աբովյան փողոցում սպանության փորձ կատարած անձի ինքնությունը. Քննչական կոմիտե
• Վարչապետն այցելել է Քննչական կոմիտե․ կարևորել է պատերազմի հանգամանքների քրեական նախաքննությունը (ՏԵՍԱՆՅՈՒԹ)

Մասնավորապես, պարզվել էր, որ Երևան քաղաքի Նորք-Մարաշ վարչական շրջանի ղեկավարի տեղակալը, Նոր Նորք վարչական շրջանում գտնվող և համայնքի սեփականությունը հանդիսացող հողատարածքը ներկայացնելով որպես փաստացի իրեն պատկանող, ձեռք բերելով գնորդի վստահությունը, փորձել էր խարդախությամբ վաճառել և հափշտակել առանձնապես խոշոր չափի՝ 4.834.900 ՀՀ դրամ գումար:

Քննությամբ փաստական տվյալներ էին ձեռք բերվել նաև այն մասին, որ իր իրավասությունների շրջանակներում գնորդի օգտին գործողություններ կատարելու դիմաց վարչական շրջանի ղեկավարի տեղակալը առանձնապես խոշոր չափերով՝ 4000 ԱՄՆ դոլար կաշառքի շուրջ համաձայնության է եկել գնորդի հետ:

Ձեռք բերված բավարար ապացույցների համակցությամբ՝ Նորք-Մարաշ վարչական շրջանի ղեկավարի տեղակալին մեղադրանք է առաջադրվել, իսկ որպես խափանման միջոց նրա նկատմամբ ընտրվել է կալանավորումը:

Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով»,- ասվում է հաղորդագրության մեջ: