Հայ-շվեդական համագործակցությունը նոր թափ է ստացել. Միրզոյան

Հայաստանի և Շվեդիայի ԱԳ նախարարներն ուղերձներ են փոխանակել Հայաստանի Հանրապետության և Շվեդիայի Թագավորության միջև դիվանագիտական հարաբերությունների հաստատման 30-ամյակի կապակցությամբ:

Արարատ Միրզոյանն իր ուղերձում մասնավորապես շեշտել է, որ Հայաստանն ու Շվեդիան ձևավորել են երկկողմ հարաբերությունների հարուստ օրակարգ, և վերահաստատել է Հայաստանի պատրաստակամությունը՝ խթանելու երկկողմ համագործակցությունը:

Նախարար Միրզոյանն նշել է, որ հայ-շվեդական համագործակցությունը նոր թափ է ստացել Հայաստանի բարեփոխումների օրակարգին Շվեդիայի ցուցաբերած աջակցության շնորհիվ, ինչի մասին են վկայում Երևանում նստավայր դեսպանության հիմնումը, երկկողմ զարգացման համագործակցության վերագործարկումը, Հայաստանի տնտեսության նկատմամբ շվեդական ընկերությունների հետաքրքրության աճը։

Շնորհավորելով գործընկերոջը՝ Շվեդիայի ԱԳ նախարար Անն Լինդեն իր ուղերձում նշել է, որ հարաբերությունների հաստատման 30-ամյակը լավ հնարավորություն է արժևորելու երկու երկրների միջև ձևավորված բարեկամական և գործընկերային հարաբերությունները։

Նախարար Լինդեն երկկողմ հարաբերությունների հետագա զարգացման պատրաստակամություն է հայտնել։