Երևանի ավտոբուսների վարորդներն այսօր գործադուլ են հայտարարել՝ պահանջելով աշխատանքային պայմանների բարելավում և աշխատավարձի բարձրացում։ Վաղ առավոտից մայրաքաղաքի կանգառները մարդաշատ են, քանի որ մի շարք ավտոբուսներ երթուղի չեն դուրս եկել։
Վարորդներից շատերն իրենց զրույցներում նշում են, որ աշխատում են արտաժամյա, իրականացնում են պայմանագրից դուրս պարտականություններ և ստիպված են իրենց միջոցներով հոգալ մեքենաների մաքրության ու վերանորոգման ծախսերը։ Նրանք նշում են, որ թեև ստանում են խոսնակի նշած աշխատավարձերը, սակայն դա չի համապատասխանում իրենց ծանրաբեռնվածությանը։
Ավտոբուսների վարորդներից մեկը «Ազատության» հետ զրույցում ընդգծել է, որ իրենց աշխատաժամերը հաճախ գերազանցում են 18 ժամը։ Մյուս վարորդն էլ հավելել է, որ առաջարկվել է հավելյալ ժամերի համար 700 դրամ ժամավճար, որը, նրանց կարծիքով, ծիծաղելի թիվ է՝ հաշվի առնելով աշխատանքի ծավալն ու ծանրաբեռնվածությունը։
Քաղաքապետարանից այս գործադուլին դեռևս պաշտոնական արձագանք չկա, սակայն մամուլի խոսնակ Հայկ Կոստանյանը նշել է, որ վարորդների աշխատավարձը սահմանվել է առանց հարկերի հետևյալ չափով՝
MAN – 401,500 ՀՀ դրամ,
Zhong Tong – 309,500 ՀՀ դրամ,
Gazel City – 219,500 ՀՀ դրամ։
Խոսնակը նաև նշել է, որ որոշ պահանջներ անտրամաբանական են և «զուգորդվում են շանտաժի դրսևորումներով»։
Վարորդներից մի քանիսը հայտնել են, որ առավոտյան իրենց տեղեկացրել են, որ գործադուլ իրականացնող բոլոր վարորդները հեռացվել են աշխատանքից։ Սակայն վարորդները պնդում են, որ իրենց պայքարը սաբոտաժ չէ, այլ ուղղված է նորմալ աշխատանքային պայմանների հաստատմանը։
Հավելենք, որ Երևանի քաղաքապետարանը գարնանը նախատեսում է շահագործման հանձնել 171 նոր ավտոբուս, որոնք պետք է փոխարինեն հին և մաշված տրանսպորտային միջոցներին։ Այս նոր փոփոխությունները կարող են ազդել նաև պայմանագրային երթուղիների և աշխատանքի կազմակերպման վրա։
Տրանսպորտային այս խնդիրները ազդում են ոչ միայն վարորդների, այլև քաղաքի բնակիչների վրա, որոնց համար դժվարացել է առօրյա տեղաշարժը։ Վարորդների և քաղաքապետարանի միջև համաձայնություն ձեռք բերելը դառնում է կարևոր, որպեսզի հնարավոր լինի վերականգնել տրանսպորտային համակարգի նորմալ աշխատանքը։
ԽՈՐՀՈւՐԴ Է ՏՐՎՈւՄ ԿԱՐԴԱԼ
