ՀՀ գլխավոր դատախազի թեկնածու Աննա Վարդապետյանը հավատացնում է, որ իր ընտրվելու դեպքում, եթե համակարգում լինեն օրինականության խախտման դեպքեր, դրանց վրա աչք չի փակվելու:
Աննա Վարդապետյանն այս մասին ասաց ԱԺ-ում իր թեկնածության հարցի քննարկմանը՝ անդրադառնալով «Քաղաքացիական պայմանագիր» խմբակցության պատգամավոր Վիլեն Գաբրիելյանի հարցին:
Պատգամավորը Վարդապետյանից տեղեկացավ, թե նրա ընտրվելուց հետո առնվազն հանրային հնչեղություն ունեցող քրեական գործերի հիմքերն արժանանալո՞ւ են ուսումնասիրման, անհրաժեշտության դեպքում՝ նաև վերանայման: Նա նաև հետաքրքրվեց, թե արդյոք իրավական հետևանքներ լինելո՞ւ են այն դատախազի համար, ով հարուցել է տվյալ քրգործերը:
«Հանրային հնչեղություն ունեցող գործեր չկան, կան գործեր, որոնք ունեն հանրային հետաքրքրություն։ Եվ այս առումով ես կարծում եմ, որ հանրային հետաքրքրություն ունեցող գործերի պակաս մենք չունենք։ Գլխավոր դատախազը չունի վարույթներ, գլխավոր դատախազի գործառույթն առավելապես կազմակերպական է, բայց նաև, իմ մասնագիտական հետաքրքրությունները հաշվի առնելով, այո, նախաձեռնելու եմ իրավական քննարկումներ, պահանջելու և խնդրելու եմ»,-ասաց թեկնածու Վարդապետյանը:
Անդրադառնալով հետևանքներին՝ նա հավատացրեց, որ եթե փաստագրվելու են օրինականության խախտումները, դրանք անհետևանք չեն մնալու, որովհետև թիրախային հետևողական մոտեցումը օրինականության խախտման նկատմամբ ճիշտ ազդակ է համակարգին, թե ինչ է ակնկալվում համակարգից։
«Տարբեր քաղաքացիների դիմումների հետ կապված՝ եղել են իրավիճակներ, երբ օրինականությունը ստուգելու արդյունքում դատախազությունը որոշակի խնդիրներ արձանագրել է հսկող դատախազի աշխատանքում և հետևանքներ է առաջացրել: Եվ դա ճիշտ ազդակ է ուղղահայաց համակարգի համար»,- ասաց Վարդապետյանը:
Անդրադառնալով պատգամավորի երկրորդ հարցին՝ թեկնածուն դրական պատասխան տվեց: «Եթե կա օրինականության խախտում, այդ օրինականության խախտման վրա աչք չի փակվելու»,-ասաց նա:
