Արցախ

Արայիկ Հարությունյանը կմասնակցի Արցախի նախագահական ընտրություններին

Արցախի նախագահի խորհրդական, «Ազատ հայրենիք» կուսակցության նախագահ Արայիկ Հարությունյանը 2020 թվականին կայանալիք նախագահական ընտրություններում առաջադրվելու հարցում կառաջնորդվի հարազատ կուսակցության որոշմամբ։ Այս մասին նա ասաց Aysor.am-ի հետ զրույցում։

«2020 թվականի նախագահական ընտրություններին «Ազատ հայրանիքի» մասնակցության որոշումը կայացվելու է համագումարին, որովհետև դա համագումարի լիազորությունն է, Արայիկ Հարությունյանի լիազորությունը չէ։ Իսկ համագումարը, երևի, տեղի կունենա օգոստոսին կամ սեպտեմբերին։ Այդ ժամանակ «Ազատ հայրենիքը» պաշտոնապես կհայտարարի նախագահական ընտրությունների իր թեկնածուի մասին», – ասաց արցախցի պաշտոնյան։

Անձնապես պատրա՞ստ է ստանձնելու նման պատասխանատու պաշտոնը, եթե կուսակցությունն իրեն նախագահի թեկնածու առաջադրի։ Արայիկ Հարությունյանը պատասխանեց, որ դա լինելու է կուսակցության դիրքորոշումը։

«Ես միանձնյա չեմ ղեկավարում այն։ Կուսակցությունն ունի ավելի քան 5 հազար անդամ, և այդ 5 հազար անդամի որոշումն ինձ համար պարտավորեցնող է լինելու։ Ես պատրաստակամ եմ իրացնելու հարազատ կուսակցության որոշումը։ Ես կուսակցության որոշմանն եմ ենթարկվելու», – ասաց Արայիկ Հարությունյանը։

ՎԵՐՋԻՆ ԼՈւՐԵՐ

ՎԵՐԵՎ