Տիգրան Պետրոսյանի անվան շախմատի տուն-մարզադպրոցում ավարտվել են Հայաստանի շախմատի տղամարդկանց 85-րդ և կանանց 80-րդ առաջնությունները, որտեղ Ռոբերտ Հովհաննիսյանը և Սուսաննա Գաբոյանը նվաճեցին չեմպիոնի տիտղոսները:
Տղամարդկանց առաջնություն
Ռոբերտ Հովհաննիսյանը, ցույց տալով անկասելի խաղ, 9 խաղափուլում վաստակել է 6,5 միավոր՝ չկրելով ոչ մի պարտություն: Սա նրա համար երրորդ չեմպիոնությունն էր Հայաստանում՝ նախորդ հաղթանակներից հետո: Երկրորդ տեղը 5,5 միավորով զբաղեցրեց Արթուր Դավթյանը, իսկ Սարգիս Սարգսյանը նույնքան միավորով եզրափակեց լավագույն եռյակը:
Այս առաջնության շրջանակում Բենիկ Ագասարովն ու Սարգիս Սարգսյանը լրացրեցին միջազգային վարպետի նորմա: Բենիկը դա արեց արդեն երրորդ անգամ, իսկ Սարգիսը՝ առաջին:
Մրցաշարին մասնակցել են բազմաթիվ բարձրակարգ շախմատիստներ, այդ թվում՝ գրոսմայստերներ Տիգրան Հարությունյանը, Կարեն Գրիգորյանը, Մամիկոն Ղարիբյանը, Հովիկ Հայրապետյանը, Մանուէլ Պետրոսյանը և Զավեն Անդրիասյանը:
Կանանց առաջնություն
Սուսաննա Գաբոյանը, վաստակելով 7 միավոր, 4-րդ անգամ դարձավ Հայաստանի չեմպիոնուհի՝ առանց պարտության: Նա արդեն հաղթել էր 2015, 2021 և 2024 թվականներին:
Երկրորդ տեղը 6,5 միավորով զբաղեցրեց Աննա Խաչատրյանը, իսկ Մարիամ Ավետիսյանը եզրափակեց լավագույն եռյակը՝ վաստակելով 6 միավոր: Միլենա Գասպարյանն ու Նվարդ Հայրապետյանը նույնպես 6 միավոր հավաքեցին, սակայն լրացուցիչ ցուցանիշներով զբաղեցրին համապատասխանաբար 4-րդ և 5-րդ հորիզոնականները:
Կանանց առաջնությանը մասնակցեցին նաև Պոլինա Կոբակը, Մելինե Հարությունյանը, Սյուզաննա Առաքելյանը և Լիլիա Դանիելյանը:
Այս արդյունքների շնորհիվ Ռոբերտ Հովհաննիսյանն ու Սուսաննա Գաբոյանը իրավունք ստացան հանդես գալ Հայաստանի հավաքականում: