Ուկրաինայի մայրաքաղաք Կիևում՝ Գերագույն ռադայի համալիրում այսօր տեղի կունենա ընտրյալ նախագահ Վլադիմիր Զելենսկու պաշտոնամուտի հանդիսավոր արարողությունը:
Գերագույն ռադայի մոտ տեղադրվել է հսկայական էկրան, որով մարդիկ կարող են հետևել ինաուգուրացիայի ռեպորտաժին: Տեղադրվել է նաև բեմ ելույթների համար:
Զելենսկին հայրենակիցներին կոչ է արել մայիսի 20-ի առավոտյան գալ Մարիինսկի այգի, որտեղից նա ոտքով կգնա խորհրդարանի շենք:
Կիևի ոստիկանությունը տեղեկացրել է, որ մայրաքաղաքի կենտրոնը, ինչպես նաև «Բորիսպոլ» օդանավակայանից քաղաք տանող ավտոմայրուղին փակ կլինեն երթևեկության համար:
«Ենթադրվում է, որ կժամանեն օտարերկրացի մեծ թվով հյուրեր, կներեք այս անհարմարությունների համար, կներեք մեզ և Գերագույն ռադային, որը մերժեց ինաուգուրացիան շաբաթ օրը՝ մայիսի 19-ին անցկացնելու իմ առաջարկը», – հայտարարել է Զելենսկին:
Ընտրյալ նախագահի թիմակիցները հայտնել են, որ ինաուգուրացիայի ընթացքն էապես կտարբերվի պաշտոնամուտի ավանդական արարողություններից:
«Կլինեն անակնկալներ», – ասել է «Ժողովրդի ծառա» հեռուստասերիալի սցենարիստ Յուրի Կոստյուկը, ով մասնակցել է պաշտոնամուտի արարողության ծրագրի մշակմանը:
Զելենսկին այդ կատակերգական սերիալում կատարել է նախագահի դերը և հենց դրա շնորհիվ է համաժողովրդական ճանաչում ձեռք բերել:
Բարձրաստիճան գործիչների անվտանգությունն ապահովող Ուկրաինայի պետական պահպանության ծառայության պետ Վալերի Գելետեյը հաստատել է, որ նախատեսվում են շեղումներ ավանդական ինաուգուրացիաներից:
«Մենք ամեն ինչ կանենք մեր աշխատանքն ամենաբարձր մակարդակով կատարելու համար, մենք չենք մերժի Զելենսկու թիմի առաջարկները՝ պայմանով, որ դրանք չեն հակասի անվտանգության ապահովման պահանջներին: Այս հարցում մեր դիրքորոշումը սկզբունքային է, որևէ զիջում անվտանգության հաշվին ընդունելի չէ», – ասել է Գելետեյը:
41-ամյա Զելենսկին ընտրությունների երկրորդ փուլում հաղթել է գործող նախագահ Պետրո Պորոշենկոյին:
Հեռացող նախագահ Պորոշենկոն ստացել է ինաուգուրացիային մասնակցելու հրավեր: «Ուկրաինսկայա պրավդա» թերթի փոխանցմամբ, հրավեր են ստացել բոլոր նախկին նախագահները՝ բացի Վիկտոր Յանուկովիչից:
![](https://azat.tv/wp-content/uploads/2022/09/azattvlogoblack.png)