Բելառուսը պատրաստ է մասնակցել Հայաստանի ուղևորափոխադրող տրանսպորտային պարկի և վերելակների արդիականացման ծրագրերին և առաջարկում է Հայաստանում վերելակների համատեղ արտադրություն հիմնել: Ինչպես հաղորդում է բելառուսական BelTA գործակալությունը, հարցը քննարկվել է Բելառուսի Ազգային ժողովի Ներկայացուցիչների պալատի նախագահ Վլադիմիր Անդրեյչենկոյի և Բելառուսում Հայաստանի դեսպան Արմեն Ղևոնդյանի միջև կայացած հանդիպման ընթացքում:
Վլադիմիր Անդրեյչենկոն հանդիպման ընթացքում ասել է, որ Հայաստանի և Բելառուսի միջև առևտրաշրջանառությունը գնալով աճում է: Նա վստահություն է հայտնել, որ կողմերը պետք է անցում կատարեն համագործակցության ավելի բարձր մակարդակի և ստեղծեն համատեղ ձեռնարկություններ: «Բելառուսը պատրաստ է մասնակցել Հայաստանի ուղևորափոխադրող տրանսպորտային պարկի, ինչպես նաև վերելակների արդիականացման ծրագրին»,- ասել է Անդրեյչենկոն:
Նա հայտնել է, որ վերելակների արտադրությամբ զբաղվող “Могилевлифтмаш” գործարանի պատվիրակությունը պլանավորում է մոտ ապագայում այցելել Հայաստան: Բելառուսի Ազգային ժողովի ներկայացուցիչների պալատի նախագահի խոսքով՝ Բելառուսը հույս ունի, որ Հայաստանում համատեղ գործարան հիմնելու որոշում կընդունվի:
Վլադիմիր Անդրեյչոնկոն նաև ընդգծել է, որ Բելառուսը շահագրգռված է Հայաստանի հետ համագործակցությունը խորացնելու և զարգացնելու հարցում:
