ՆԱՏՕ-ի գլխավոր քարտուղար Յանս Ստոլտենբերգը հայտարարել է, որ Ուկրաինան կանդամակցի ՆԱՏՕ-ին: Այս մասին նա ասել է «1+1» հեռուստաընկերությանը տված հարցազրույցի ժամանակ:
«Բոլոր դաշնակիցները համաձայնել են, որ Ուկրաինան դառնա դաշինքի անդամ: Մոնտենեգրոն անդամակցել է ՆԱՏՕ-ին ընդամենը 2 տարի առաջ, Հյուսիսային Մակեդոնիան կանդամակցի մի քանի ամսից: Լեհաստանը, մերձբալթյան երկրները նույնիսկ երազում չէին կարող պատկերացնել, որ կդառնան ՆԱՏՕ-ի անդամ»,-ասել է Ստոլտենբերգը:
Գլխավոր քարտուղարի խոսքով՝ կազմակերպություն կօգնի Ուկրաինային էլ ավելի մեծ թափ հաղորդել բարեփոխումներին ու արդիականացնել հասարակությանը։
«Որոշ երկրների համար գործընկերությունն առաջին քայլը դաշինքին անդամակցումն է: Բայց գործընկերության բոլոր երկրների համար դա մշտական հարաբերություններն են ՆԱՏՕ-ի հետ: Պետք է գիտակցել, որ մեծ տարածություն կա «ոչ մի հարաբերության» և «լիարժեք անդամակցության» միջև»,-ասել է գլխավոր քարտուղարը:
Նա նշել է, որ Ուկրաինայի լիարժեք անդամակցության համար դաշինքը պետք է հասկանա, թե ինչ կարող է անել այդ երկրի հետ միասին:
Հոկտեմբերի վերջին ուկրաինական Գերագույն ռադայում ելույթի ժամանակ Ստոլտենբերգը նշել էր, որ դաշինքին անդամակցելու ճանապարհը հեշտ չէ, բայց ՆԱՏՕ-ի դռները շարունակում են բաց մնալ Ուկրաինայի համար: