Լաս Վեգասի հայտնի կատակերգու Սքոթ Թոմփսոնը, որն առավել հայտնի է «Քերոթ Թոփ» (Carrot Top) բեմական անվամբ, անհայտ պատճառներով հոսպիտալացվել է, ինչի հետևանքով չեղարկվել են Luxor հյուրանոց-կազինոյում նախատեսված նրա առաջիկա ելույթները:
Դերասանի մամուլի քարտուղար Ջեմի Շլիխերը հաստատել է այս տեղեկությունը՝ նշելով, որ արտիստն այժմ ապաքինվում է հիվանդանոցում և ստանում է անհրաժեշտ բժշկական օգնություն: «Պարոն Թոմփսոնն ապաքինվում է հիվանդանոցում և ստանում է իրեն անհրաժեշտ խնամքն ու աջակցությունը»,- հայտնել է Շլիխերը Las Vegas Review-Journal պարբերականին՝ հավելելով, որ արտիստի ընտանիքը շնորհակալ է մտահոգության համար և խնդրում է հարգել իրենց գաղտնիությունը:
Luxor-ի սեփականատեր հանդիսացող MGM Resorts ընկերությունը նույնպես հանդես է եկել հայտարարությամբ՝ աջակցություն հայտնելով երկարամյա արտիստին: Ընկերության ներկայացուցիչը Թոմփսոնին անվանել է իրենց ընտանիքի «սիրելի անդամ» և մաղթել շուտափույթ ապաքինում:
Հոսպիտալացման մասին առաջինը հայտնել էր TMZ պորտալը: Թոմփսոնին վերջին անգամ տեսել էին ուրբաթ օրը՝ ժամը 14:00-ի սահմաններում, Դաունթաուն Սամերլինի հանրային վայրերից մեկում՝ իր նախատեսված ելույթից ընդամենը ժամեր առաջ:
Ստեղծված իրավիճակի պատճառով ուրբաթ և շաբաթ երեկոյան կայանալիք ներկայացումները չեղարկվել են: Կիրակի օրերին նրա շոուները սովորաբար չեն կայանում, իսկ երկուշաբթի և հաջորդ շաբաթվա մյուս օրերի տոմսերը դեռևս վաճառվում են: MGM Resorts-ի ներկայացուցիչները հայտնել են, որ դեռևս հստակ տեղեկություններ չունեն արտիստի բեմ վերադառնալու ժամկետների մասին:
Սքոթ Թոմփսոնը Լաս Վեգասի ամենաճանաչված դեմքերից է. նա Luxor-ի Atrium Showroom-ում հանդես է գալիս որպես գլխավոր արտիստ սկսած 2005 թվականի նոյեմբերից՝ ունենալով քաղաքի պատմության մեջ ամենաերկարատև անհատական կատակերգական շոուներից մեկը: