Չինական պետական Yanchang Petroleum ընկերությունը, որը հանդիսանում է Չինաստանի ներքին հատվածում նավթամթերքի խոշորագույն արտադրողներից մեկը, առաջիկա ամիսներին կդադարեցնի ռուսական հում նավթի գնումները։ Ընկերությունը, որը կապված է Շանսի նահանգային կառավարության հետ, դեկտեմբերից մինչև փետրվարի կեսերն ընկած ժամանակահատվածում չի մասնակցի ռուսական նավթի մատակարարումների մրցույթին։ Այս մասին տեղեկացնում է Reuters-ը՝ հղում կատարելով երկու աղբյուրների։
Yanchang Petroleum-ի հիմնական ձեռնարկությունները գտնվում են Շանսի նահանգում, որը ցամաքով շրջապատված հյուսիսային նահանգ է։ Մինչ այժմ ընկերությունը ամսական կտրվածքով գնում էր ռուսական նավթի մեկ բեռ։ Reuters-ի մեկնաբանության հարցմանը ընկերությունը չի արձագանքել։
Ռուսական նավթի նկատմամբ հետաքրքրության նվազումը կապված է ԱՄՆ-ի կողմից սահմանված պատժամիջոցների հետ։ Դոնալդ Թրամփի վարչակազմը սահմանել էր պատժամիջոցներ ռուսական «Լուկոօյլ» և «Ռոսնեֆտ» նավթային ընկերությունների դեմ։ Արդյունքում, Չինաստանում և Հնդկաստանում ռուսական նավթի որոշ խոշոր ներմուծողներ սկսել են ձեռնպահ մնալ ռուսական նավթ գնելուց։