Ուժեղ և անկոմպլեքս՝ այսպես է նկարագրում իր բրենդը երևանաբնակ հագուստի դիզայներ (և ոչ միայն) Անի Չոփուրյանը։
Chopurian բրենդը ներկայացնում է ավանգարդ, բայց մոդեռն հագուստներ և աքսեսուարներ։
Այն զերծ է ավելորդություններից, ծանրաբեռնված դիզայնից և չափազանցված ճոխությունից։
Չոփուրյանը սկսել է զբաղվել հագուստի դիզայնով անհատապես` ինքն իր համար։
Մասնակցելով բազմաթիվ հավաքույթների, հաճախ գտնվելով շատ մարդկանց մեջ` դիզայները ավելի պարզ է սկսել գիտակցել, որ հագուստը ներկայացուցչական շատ լուրջ գործիք է։
Հագուստը պետք է արտահայտի մասնագիտություն, ինտելեկտ, ճաշակ, կարծիք, դիրքորոշում, երաժշտություն, բայց ոչ միշտ սոցիալական վիճակ։ Այս ամենը բրենդի գաղափարախոսության մասն են կազմում։
Հենց գաղափարավոսությամբ և փիլիսոփայությամբ է տարբերվում Chopurian բրենդը մյուսներից։ Անին ստեղծում է արվեստ հագուստի և աքսեսուարների տեսքով՝ արտացոլելովիր ներուժը, անցյալը և ներաշխարհը։
Չոփուրյանը դեռ մանկուց է հետաքրքրվում հագուստի դիզայնով, նրա տատիկը իրեն անգամ կոչում էր «իմ Շանել»։
Երիտասարդ դիզայները իր բոլոր ռեսուրսները (թե՛ էներգիան, թե՛ եկամուտը) տարիներով ծախսել է իր երազանքի վրա և համոզված եմ, որ դեռ մեծագույն բարձրունքների է հասնելու։
Այժմ Chopurian բրենդը աշխատում է շատ բարդ խնդրի շուրջ՝ ստեղծել դասական մոդեռն քեժուալ և հայկական մոտիվներով հագուստի շարք։
Այս համադրություններով համահունչ հավաքածու ստեղծելը հեշտ գործ չէ, բայց վստահ եմ, որ Անի Չոփուրյանը կհասնի իր նպատակին` ստեղծելով նրբաճաշակ, յուրօրինակ և տպավորիչ արդյունքներ։
Աննա Մարտիրոսյան