ԱՄՆ-ում Cyclospora մակաբույծի բռնկումը, որը կապվում է աղտոտված հազարի օգտագործման հետ, հանգեցրել է հանրային սննդի խոշոր ցանցեր այցելությունների նկատելի նվազման։ Placer.ai վերլուծական ընկերության տվյալներով՝ սպառողների մտահոգությունը տարածվել է ոչ միայն այն ապրանքանիշերի վրա, որոնք պաշտոնապես հիշատակվել են առողջապահական մարմինների կողմից։
Անցյալ շաբաթ Սննդամթերքի և դեղերի վարչությունը (FDA) և Հիվանդությունների վերահսկման և կանխարգելման կենտրոնները (CDC) հայտարարեցին, որ Taco Bell-ի որոշ ռեստորաններում մատուցվող հազարը կապված է մակաբույծի տարածման հետ։ Հուլիսի 17-ին հրապարակված այս տեղեկությունից հետո Taco Bell-ի այցելությունները նվազել են 19%-ով։ Մինչ այդ՝ հուլիսի 15-ին, ընկերությունն արդեն գրանցել էր այցելությունների 16.9% անկում։
Իրավիճակը ազդել է նաև այլ ցանցերի վրա։ Subway-ում հուլիսի 16-ին այցելությունները նվազել են 19.2%-ով, իսկ Chopt աղցանների ցանցը հուլիսի 16-ին և 17-ին գրանցել է համապատասխանաբար 10.9% և 14.3% անկում։ Cava, Chipotle և Panera Bread ցանցերը նույնպես գրանցել են շուրջ 10% անկում։
Թեև հետաքննությունը շարունակվում է, FDA-ն երկուշաբթի օրը հայտնել է, որ որպես վարակի հավանական աղբյուր դիտարկում է Taylor Farms ընկերությունը, որը մատակարարում է Taco Bell-ի շատ կետեր։ Chipotle-ն իր հերթին հայտարարել է, որ իրենց օգտագործած բաղադրիչները կապ չունեն բռնկման հետ։ Չնայած առանձին ցանցերում նկատվող անկմանը՝ արագ սննդի ոլորտը որպես ամբողջություն պահպանում է կայունությունը՝ գրանցելով ընդամենը 1-2% անկում։