Նոյեմբերի 26-ին Dasaran կրթական կենտրոնում ամփոփվել է «Նոր սերնդի դպրոց 2017-2018» վարկանիշավորման մրցույթը:
Դրան մասնակցում էին Հայաստանի և Արցախի՝ Dasaran կրթական ծրագրի էլեկտրոնային միջավայրին միացած 1484 դպրոցները:
Մրցույթն իրականացրել են Հայաստանի ու Արցախի կրթության և գիտության նախարարությունները, Երևանի քաղաքապետարանը` «Նոր սերնդի դպրոց» ՀԿ-ի և Dasaran ծրագրի հետ համատեղ:
«Նոր սերնդի դպրոց» հանրակրթական դպրոցների վարկանիշավորման մրցույթը նպատակաուղղված է հանրակրթական դպրոցներում դասավանդող ուսուցիչների համակարգչային գիտելիքների վերազինմանը, դպրոցներում տեղեկատվական տեխնոլոգիաների ակտիվ կիրառման և Dasaran-ի էլեկտրոնային հարթակի լիարժեք գործածման խրախուսմանը: Այն նպատակ ունի նաև ծնողների համար ուսումնական գործընթացն ու աշակերտների առաջադիմությունը դարձնել առավել թափանցիկ և վերահսկելի»,- նշել է Dasaran ծրագրի հիմնադիր նախագահ Սուրեն Ալոյանը:
Մրցույթի ամփոփման և մրցանակաբաշխության արարողության ժամանակ Հայաստանի և Արցախի 61 դպրոց պարգեւատրվել է տարբեր մրցանակներով, այդ թվում՝ համակարգիչներով, գրադարաններով և պատվոգրերով:
Ամենաբարձր արդյունավետությունն են դրսեւորել ՀՀ Կոտայքի մարզի Գեղաշեն գյուղի միջնակարգ, Կոտայքի մարզի Աբովյանի թիվ 5 հիմնական, Կոտայքի մարզի Զորավան գյուղի միջնակարգ, Կոտայքի մարզի Գառնի Բանավան գյուղի հիմնական, Կոտայքի մարզի Նուռնուս գյուղի միջնակարգ, Արագածոտնի մարզի Չքնաղ գյուղի հիմնական, Արցախի Հանրապետության Քաշաթաղի շրջանի Ուռեկանի գյուղի միջնակարգ դպրոցները:
ԽՈՐՀՈւՐԴ Է ՏՐՎՈւՄ ԿԱՐԴԱԼ
