Հունիսի 19-ին՝ ուրբաթ օրը, Հյուսիսային Տեխասում տեղի ունեցած հզոր ամպրոպները հանգեցրել են Դալասի Ֆորտ Ուերտ միջազգային օդանավակայանի (DFW) և Դալաս Լավ Ֆիլդ օդանավակայանի աշխատանքի ժամանակավոր դադարեցմանը: FlightAware-ի տվյալներով՝ եղանակային անբարենպաստ պայմանների պատճառով DFW-ում չեղարկվել է մոտ 400, իսկ Լավ Ֆիլդում՝ 65 չվերթ:
ԱՄՆ Ազգային օդերևութաբանական ծառայությունը (National Weather Service) Դալասի, Քոլինի և Դենթոնի շրջաններում հեղեղումների վտանգի մասին նախազգուշացում էր հրապարակել: Տեղումների ինտենսիվությունը հասել է մինչև 5 դյույմի (մոտ 12 սմ), ինչը հանգեցրել է ճանապարհների ողողման և օդանավակայանների լոգիստիկայի խափանման:
Դալասի հրշեջ-փրկարարական ծառայության տվյալներով՝ միայն առավոտյան ժամերին ստացվել է 76 կանչ՝ ջրի մեջ մնացած մեքենաների, մի քանի ջրային փրկարարական աշխատանքների և շինություններում բռնկված հրդեհների վերաբերյալ: Oncor էներգետիկ ընկերությունը հայտնել է, որ փոթորիկների հետևանքով Դալաս-Ֆորտ Ուերտ մետրոպոլիայում շուրջ 24,000 բաժանորդ մնացել է առանց էլեկտրականության:
Թեև ուրբաթ օրվա երկրորդ կեսին օդանավակայանների աշխատանքը վերականգնվել է, չվերթների զանգվածային չեղարկումները երկարատև ազդեցություն են ունեցել ուղևորների փոխադրումների վրա: Օդերևութաբանները նախազգուշացնում են, որ հանգստյան օրերին տարածաշրջանում սպասվում է շոգ և խոնավ եղանակ՝ ջերմաստիճանի զգացողության 105 աստիճանից բարձր ցուցանիշով: