2024 թվականի հուլիսի 1-ից ուժի մեջ է մտել «Ընտանիքում բռնության կանխարգելման, բռնության ենթարկված անձանց պաշտպանության և ընտանիքում համերաշխության վերականգնման մասին» օրենքում փոփոխություններ և լրացումներ կատարելու մասին օրենքը։ Այս փոփոխությունները նախատեսում են ընտանեկան և կենցաղային բռնության ենթարկված անձանց պաշտպանության համար առավել արդյունավետ մեխանիզմներ։
Դեկտեմբերի 12-ին ՆԳ նախարարի հրամանով սահմանվել է նոր կարգ, որով հստակեցվում են անհետաձգելի միջամտության և պաշտպանական որոշումների կատարման հսկողության ընթացակարգերը։ Այս կարգավորումները, որոնք էապես տարբերվում են նախկին հրամանի դրույթներից, միտված են բարձրացնելու ընտանեկան բռնության կանխարգելման և պաշտպանության համակարգի արդյունավետությունը։
ՆԳՆ-ի տեղեկացմամբ՝ հսկողությունը իրականացվում է ՆԳՆ ոստիկանության համայնքային ոստիկանության գլխավոր վարչության ենթակա ստորաբաժանումների լիազորված ծառայողների կողմից, ովքեր կիրառելու են ինչպես անձնական այցեր, այնպես էլ էլեկտրոնային հսկողության միջոցներ։ Էլեկտրոնային հսկողությունը կոչված է ապահովելու բռնության ենթարկված անձանց անվտանգության ավելի բարձր մակարդակ։
Նոր կարգավորումները ներառում են հստակ գործողությունների և համագործակցության մեխանիզմներ։ Հատկանշական է, որ ցանկացած տեղեկություն անհետաձգելի միջամտության կամ պաշտպանական որոշումների խախտման մասին կստիպի իրավասու ծառայողներին այցելել բռնության ենթարկված անձի փաստացի գտնվելու վայր 24 ժամվա ընթացքում։
Հաստատվել է նաև պարբերական այցելությունների ժամանակացույց.
-Անհետաձգելի միջամտության որոշումների դեպքում՝ այցելությունները պետք է իրականացվեն ոչ ուշ, քան 10 օրը մեկ։
-Պաշտպանական որոշումների դեպքում՝ այցելությունները պետք է իրականացվեն ոչ ուշ, քան ամիսը մեկ անգամ։
Բացի այդ, հստակեցվել են շահագրգիռ մարմինների հետ համագործակցության մեխանիզմները, որոնք նպատակ ունեն համատեղ ուժերով առավել արդյունավետ պաշտպանություն ապահովել բռնության ենթարկված անձանց համար։
Այս փոփոխությունները կարևոր քայլ են ընտանեկան և կենցաղային բռնության դեմ պայքարում՝ ուղղված բռնության ենթարկված անձանց իրավունքների և անվտանգության պաշտպանության բարձրացմանը։
