Հուլիսի 14-ից 27-ը Երևանում կայանալիք Եվրոպայի Մ-19 առաջնության եզրափակիչ մրցաշարի բրենդային դիզայնով ձևավորված ֆուտբոլային գնացքը 3 ամիս շարունակ՝ մինչ տարվա կարևորագույն իրադարձության մեկնարկը և ամբողջ մրցաշարի ընթացքում, կիրականացնի իր ուղերթները Երևանի մետրոպոլիտենի կայարաններում:
Ապրիլի 26-ին՝ ժամը 11:30-ին՝ Երևանի մետրոպոլիտենի Բարեկամություն կայարանի կառամատույցում, կկայանա Երևանի մետրոպոլիտենի ֆուտբոլային գնացքի առաջին ուղերթի մեկնարկն ազդարարող միջոցառումը: Ժամանցային ծրագրի հանդիսավարն է ճանաչված դերասան, երգիչ և հաղորդավար Արամ MP3-ը: Ներկա կլինեն Հայաստանի մինչև 19 տարեկանների հավաքականի գլխավոր մարզիչ Արթուր Ոսկանյանը և ֆուտբոլիստները:
Հյուրերի թվում են Հայաստանի ազգային հավաքականի լեգենդար ֆուտբոլիստներ, այլ մարզաձևերում աշխարհի և օլիմպիական չեմպիոններ, այլ պաշտոնյաներ:
Միջոցառումը լուսաբանելու ցանկություն ունեցող լրատվամիջոցների ներկայացուցիչները պետք է մինչև ապրիլի 25-ը՝ ժամը 17:00, հաստատեն իրենց մասնակցությունը՝ media@ffa.am էլ. հասցեին ուղարկելով նամակ՝ «Հաստատում եմ իմ մասնակցությունը» տեքստով, և նշելով իրենց անուն-ազգանունը, լրատվամիջոցի անվանումը և մասնագիտացումը (լրագրող, լուսանկարիչ, օպերատոր): Լրատվամիջոցների ներկայացուցիչները պետք է ներկայանան Մետրոպոլիտենի Բարեկամություն կայարանի կառամատույց լրագրողական բեյջերով՝ մինչև ժամը 11:20: Առանց բեյջ ներկայացած անձանց չի թույլատրվի լուսաբանել միջոցառումը: Նախատեսված են հարցազրույցներ, շփումներ հյուրերի հետ, լուսանկարվելու հնարավորություն, անակնկալներ:
![](https://azat.tv/wp-content/uploads/2022/09/azattvlogoblack.png)