«Collider»-ին տված բացառիկ հարցազրույցում «Վիշապի տունը» սերիալի դերասաններ Յուան Միտչելը և Օլիվիա Կուկը մեկնաբանել են 3-րդ եթերաշրջանի պրեմիերայի ամենաքննարկվող դրվագը, որտեղ Էյմոնդ Թարգարիենը անսպասելի համբուրում է իր մորը՝ Ալիսենտ Հայթաուերին։
«Վիշապների պար» կոչվող քաղաքացիական պատերազմի թեժացման ֆոնին Էյմոնդը ստանձնել է Երկաթե գահի կառավարումը՝ իր եղբոր՝ Էյգոնի բացակայության պայմաններում։ Միտչելը, որը մարմնավորում է Էյմոնդին, պարզաբանել է, որ իր կերպարը նոր իշխանությունը դիտարկում է որպես ընտանիքի ղեկավարի կարգավիճակ։ «Էյմոնդի համար նա «Կանաչների» թիմի թագավորն է և ցանկանում է գործել համապատասխանաբար։ Նա այժմ հոր դերում է», – նշել է դերասանը։ Նա ընդունել է, որ Էյմոնդի «սերն արտահայտելու աղավաղված ընկալումը» պայմանավորված է մանկության տարիներին սիրո պակասով՝ հավելելով, որ համբույրի տեսարանը «հավանաբար մի փոքր չափազանցված էր»։
Օլիվիա Կուկը, որը մարմնավորում է Ալիսենտին, նկարագրել է իր հերոսուհու արձագանքը որպես շոկի և ցավի խառնուրդ։ Քաղաքական բարդ իրավիճակում հայտնված Ալիսենտը ստիպված է պահպանել չեզոքություն՝ Էյմոնդի զայրույթը չհրահրելու համար։ Կուկը «Collider»-ին հայտնել է, որ այս պահը Ալիսենտի համար մայրական ձախողման ցավալի գիտակցում է։ «Ալիսենտի համար սրտաճմլիկ է տեսնել, որ իր փոքրիկ տղան վերածվել է այս շփոթված և վտանգավոր մարդու», – նշել է դերասանուհին։
Սերիալի նոր դրվագները շարունակում են ցուցադրվել կիրակի օրերին HBO և HBO Max հարթակներում։