Ֆիջիի իշխանությունները պաշտոնապես հայտարարել են ՄԻԱՎ-ի ազգային արտակարգ դրություն՝ երկրում վարակի տարածման աննախադեպ աճի պատճառով։ Առողջապահության նախարար Ատոնիո Լալաբալավուն չորեքշաբթի օրը հայտնել է, որ իրավիճակը պահանջում է կառավարության համակարգված և հրատապ միջամտություն, քանի որ վարակակիրների թիվը հասել է մեկը 60-ի հարաբերակցության՝ հինգ տարի առաջվա մեկը 167-ի դիմաց, հաղորդում է Euronews-ը։
Ճգնաժամի մասշտաբները
Պաշտոնական տվյալներով՝ 2025 թվականին արձանագրվել է ՄԻԱՎ-ի 2016 նոր դեպք, ինչը 16 անգամ գերազանցում է 2019 թվականի ցուցանիշը։ ՄԻԱՎ/ՁԻԱՀ-ի դեմ պայքարի ՄԱԿ-ի միացյալ ծրագրի (UNAIDS) համաձայն՝ փոխանցման հիմնական ուղիները սեռական ճանապարհն են (ավելի քան 50%) և ներերակային թմրամիջոցների օգտագործումը (ավելի քան 42%)։ Իրավիճակը հատկապես մտահոգիչ է մայրական և մանկական առողջության տեսանկյունից. անցյալ տարի ծնված 59 ՄԻԱՎ-ակիր նորածիններից 18-ը մահացել են մինչև մեկ տարեկան դառնալը։
Ինչպես նշում է USA Today-ը, երկրում ՄԻԱՎ-ով ապրող մոտ 9100 մարդկանցից միայն 39%-ն է տեղյակ իր կարգավիճակի մասին, իսկ հակառետրովիրուսային բուժում է ստանում ընդամենը 22%-ը։ Նախարար Լալաբալավուն ընդգծել է, որ իշխանությունները հրաժարվում են «սովորական աշխատանքային ռեժիմից»՝ անցնելով արտակարգ միջոցառումների։
Պատասխան գործողություններ
Կառավարությունը ստեղծել է նախարարական հատուկ հանձնաժողով, որը պետք է հեշտացնի բուժծառայությունների հասանելիությունը։ Ծրագիրը ներառում է անվճար թեստավորման ընդլայնում, կանխարգելիչ դեղամիջոցների (PrEP) տրամադրում և ասեղների ու ներարկիչների փոխանակման ծրագրի ներդրում։ Միջազգային գործընկերների, այդ թվում՝ Ավստրալիայի, Նոր Զելանդիայի, Հնդկաստանի և ՄԱԿ-ի աջակցությամբ, Ֆիջին նպատակ ունի կանխել համաճարակի հետագա տարածումը։ Փորձագետները նշում են, որ խնդիրը բարդանում է Ֆիջիի՝ որպես թմրամիջոցների տարանցիկ հանգույցի դերով, ինչը նպաստում է վիրուսի տարածմանը խոցելի խմբերի շրջանում։