Գերմանիայի էկոնոմիկայի նախարարությունը ճգնաժամային ծրագիր է պատրաստում ռուսական գազի մատակարարումների հանկարծակի դադարեցման դեպքում։ Այս մասին Reuters-ին հայտնել են իրազեկ աղբյուրները։
Ի թիվս այլ բաների, արտակարգ իրավիճակների փաթեթը ներառում է պետական վարկեր և երաշխիքներ՝ աջակցելու էներգետիկ ընկերություններին և վերահսկելու կարևոր ձեռնարկությունները, ինչպիսիք են նավթավերամշակման գործարանները: Դիտարկվում է նաև էներգետիկ ընկերությունների ազգայնացման տարբերակը, սակայն նման քայլը պետք է «մանրակրկիտ կշռադատվի և հիմնավորվի էներգամատակարարման անվտանգությամբ, այլ ոչ թե Ռուսաստանին պատժելով»։
Մայիսի 7-ին Commerzbank-ի նախագահ Մանֆրեդ Նոուն կանխատեսել էր սնանկացման ալիք Գերմանիայում առանց ռուսական գազի։ «Գերմանիայում էներգակիրների մատակարարումը վտանգի տակ է, մատակարարման շղթաները կոտրվում են, ունենք բարձր գնաճ։ Մենք չպետք է ինքներս մեզ խաբենք. մեր շուկաներում սնանկությունների թիվը, ամենայն հավանականությամբ, կավելանա»,-ասել է նա:
Այս պահին գերմանացիները գազի և էլեկտրականության համար կրկնակի շատ են վճարում, քան 2021 թվականին։