Դեկտեմբերի 6-ից 13-ը Կաստել Գանդոլֆոյում անցկացվում է «Hallelujah» կինոփառատոնի առաջին թողարկումը, որի նպատակն է կինոն ներկայացնել որպես երկխոսության, խորհման և խաղաղության կառուցման միջոց։ Փառատոնը հիմնադրվել է Պասկալ Վիչեդոմինիի կողմից և աջակցվում է «The Artist Club Italia» հասարակական կազմակերպության կողմից։ Միջոցառման ընթացքում կանցկացվեն ֆիլմերի ցուցադրություններ, հանդիպումներ և վկայություններ՝ Կաստելի խորհրդանշական վայրերում՝ Մարիապոլի կենտրոնում, «Borgo Laudato Si’»-ում, Պաոլո VI դպրոցում և Կաստելի սրբավայրերում։
Բացման երեկոյին կհնչի Էնիո Մորիկոնեի երաժշտությունը՝ Ռոլանդ Ջոֆեի «Mission» ֆիլմի ցուցադրությամբ, որի հնչյունները դարձել են դասական։ Հատուկ մրցանակներ կշնորհվեն կոմպոզիտորի որդուն՝ Անդրեա Մորիկոնեին, և ֆլեյտահար Անդրեա Գրիմինելիին՝ Մորիկոնեի երաժշտությունը աշխարհին ներկայացնելու համար։ Փառատոնի օրակարգում ընդգրկված են նաև այնպիսի ֆիլմեր, որոնք անդրադառնում են ժամանակակից մարդասիրական խնդիրներին, ինչպես օրինակ՝ Մատեո Գարոնեի «Io Capitano» ֆիլմը, որը լուսաբանում է աֆրիկյան միգրացիայի դրաման։ Հոլոքոստի մասին հիշողությունն ընդգծվում է Միմո Կալոպրեստիի «Volevo solo vivere» վավերագրական ֆիլմում, որտեղ ներկայացված են ցեղասպանությունից փրկվածների ուղիղ վկայությունները։
Փառատոնի շրջանակներում տեղի կունենան հանդիպումներ մշակույթի և հաղորդակցության նշանավոր ներկայացուցիչների հետ, ինչպես նաև միջկրոնական միջոցառում Ալբանո Լացիալեի Սուրբ Պանկրացիո տաճարում՝ տարբեր հավատքների և ավանդույթների երկխոսության կարևորությունը ընդգծելու նպատակով։ «Hallelujah» կինոփառատոնը կոչված է ոչ միայն արվեստը ներկայացնել, այլ նաև մարդկային պատմությունների միջոցով խթանել խաղաղությունն ու փոխըմբռնումը։