Փարիզում երեք քրդերի սպանության գործով ձերբակալված կասկածյալը քննիչներին պատմել է «օտարերկրացիների հանդեպ իր ատելության մասին», հայտնել են Փարիզի դատախազները։
Ուրբաթ օրը 69-ամյա տղամարդը ձերբակալվել է այն բանից հետո, երբ կրակել եւ սպանել է երկու տղամարդու եւ մեկ կնոջ՝ Փարիզի 10-րդ թաղամասում գտնվող քրդական մշակութային կենտրոնում եւ մոտակայքում գտնվող քրդական սրճարանում։
Սպանությունները ապշեցրել են համայնքին, եւ բողոքի ակցիաների պատճառ դարձել, որոնք հանգեցրել են ոստիկանության հետ բախումների:
Կասկածյալը հարցաքննության ժամանակ ասել է, որ 2016 թվականին իր տանը կատարված կողոպուտը «պաթոլոգիական ատելություն է առաջացրել օտարերկրացիների նկատմամբ», ասվում է դատախազ Լաուրա Բեկոյի տարածած հայտարարության տեքստում:
Դատախազի խոսքով՝ տղամարդն իրեն նկարագրել է որպես ընկճված՝ ասելով, որ հարձակումից հետո ծրագրել է ինքնասպան լինել։
Նրա խոսքով՝ կասկածյալի ծնողների տանը, որտեղ նա ապրում էր, խուզարկության արդյունքում ծայրահեղական գաղափարախոսության հետ կապի որեւէ ապացույց չի հայտնաբերել։
Քուրդ պաշտոնյաները կոչ են արել ուրբաթ օրը տեղի ունեցած հարձակումը ահաբեկչություն որակել։ Դատախազի խոսքով՝ կասկածյալը շարունակում է մնալ հոգեբուժարանում այն բանից հետո, երբ շաբաթ օրը, առողջական պատճառներով, նրա հարցաքննությունը դադարեցվել է։
Ինչ վերաբերում է կրակոցներից տուժած մյուս երեք անձանց, ապա երկուսը դեռեւս հիվանդանոցում են, սակայն նրանց կյանքին վտանգ չի սպառնում։
Դատախազն ավելի վաղ ասել էր, որ կասկածյալը վերջերս ազատ է արձակվել կալանքից՝ մեկ տարի առաջ Փարիզի գաղթականների ճամբարում տեղի ունեցած հարձակման համար կալանավորված լինելուց հետո:
ԽՈՐՀՈւՐԴ Է ՏՐՎՈւՄ ԿԱՐԴԱԼ
