Այսօր իշխող Արդարություն և զարգացում կուսակցության համագումարի ընթացքում Թուրքիայի նախագահ Ռեջեփ Թայիփ Էրդողանն անդրադարձել է ղարաբաղյան հակամարտությանը:
Անադոլու գործակալության հաղորդմամբ՝ Էրդողանը նշել է, որ «Հայաստանի կողմից երկար տարիներ Ադրբեջանի տարածքի մոտ 20 տոկոսի օկուպացիան ցավ էր պատճառում ինչպես ադրբեջանական, այնպես էլ թուրք ժողովուրդներին»:
«ԵԱՀԿ Մինսկի խմբի համանախագահները 30 տարի շարունակ ոչինչ չէին ձեռնարկել՝ խնդիրն ավելի խճճելով: Միևնույն ժամանակ, մեր եղբայրները Ադրբեջանում միշտ հանդես էին գալիս խնդիրը երկխոսության միջոցով կարգավորելու օգտին: Ի պատասխան Հայաստանը շարունակում էր սադրանքներն ու հրետակոծությունները՝ բանակցային գործընթացը տանելով փակուղի», – ասել է Թուրքիայի նախագահը:
Էրդողանը շեշտել է, որ Հարավային Կովկասում լարվածության նոր փուլը հայկական կողմի հերթական սադրանքի հետևանքն էր:
«Ի պատասխան՝ Թուրքիան Ադրբեջանին տրամադրեց բոլոր հնարավորությունները՝ աջակցելով եղբայրական ժողովրդին: Թուրքիայի աջակցության և ադրբեջանական բանակի հերոսության շնորհիվ վերջ տրվեց այս կեղտոտ օկուպացիային: Այս իրադարձությունները ամրապնդեցին Թուրքիայի և Ադրբեջանի միջև եղբայրությունը: Մենք կշարունակենք հետևել Ղարաբաղի վերաբերյալ բոլոր համաձայնությունների կատարման ընթացքին», – ասել է Էրդողանը:
