Սեպտեմբերի 27-ին ՀՀ Ազգային ժողովում տեղի է ունեցել Արևելյան գործընկերության երկրների խորհրդարանների գլխավոր քարտուղարների չորրորդ հանդիպումը, որին մասնակցել են Հայաստանի, Վրաստանի, Մոլդովայի խորհրդարանների գլխավոր քարտուղարները, ներկայացուցիչներ աշխատակազմերից, Գերմանիայի միջազգային համագործակցության ընկերությունից (GIZ):
ՀՀ ԱԺ աշխատակազմի ղեկավար-գլխավոր քարտուղար Տիգրան Գալստյանը, ողջունելով գործընկերներին Հայաստանի խորհրդարանում, ափսոսանքով է հայտնել, կառույցի անդամ երկրների ոչ բոլոր աշխատակազմի ղեկավար-գլխավոր քարտուղարներն են ներկա տարեկան հանդիպմանը:
Տիգրան Գալստյանը, կարևորելով նմանատիպ ձևաչափով հանդիպման անհրաժեշտությունը, վստահեցրել է, որ դրանք կնպաստեն գործընկեր երկրների զարգացմանը:
ՀՀ ԱԺ աշխատակազմի ղեկավար-գլխավոր քարտուղարն անդրադարձել է քննարկվելիք հարցերի շրջանակին:
Վրաստանի խորհրդարանի գլխավոր քարտուղար Գիվի Միկանաձեն ներկայացրել է Արևելյան գործընկերության երկրների խորհրդարանների գլխավոր քարտուղարների գործընկերության համագործակցության 2018-2019թթ տարեկան զեկույցը:
Ամփոփելով հաշվետու տարին` բանախոսը մասնավորապես անդրադարձել է Արևելյան գործընկերության երկրների խորհրդարանների հետազոտական ցանցի` eap-sg.net հասցեով վեբ կայքին? տեղեկացնելով, որ այն հնարավորություն է ընձեռնում գործընկերների հետ սեղմ ժամկետներում փոխանցել ընդհանուր հետաքրքրություն ներկայացնող տեղեկություններ, գաղափարներն ու լավագույն փորձը: Վեբ կայքում տեղադրվում են կառույցի գործունեությանը վերաբերող տեղեկատվությունը:
Գիվի Միկանաձեի ներկայացմամբ` Վրաստանը Արևելյան գործընկերության երկրների խորհրդարանների գլխավոր քարտուղարների գործընկերության նախագահող երկիր էր ընտրվել մեկ տարի ժամանակահատվածով, ինչն ավարտվում է այս տարի հոկտեմբերին, ուստի և առաջարկել է, որ 2019-2020 թթ. Հայաստանը ստանձնի կառույցի նախագահությունը:
Վրաստանի խորհրդարանի գլխավոր քարտուղարի առաջարկն ընդունվել է միաձայն:
ՀՀ ԱԺ աշխատակազմի ղեկավար-գլխավոր քարտուղար Տիգրան Գալստյանը, շնորհակալություն հայտնելով վստահության և աջակցության համար, ակտիվ համագործակցության պատրաստակամություն է հայտնել` ներկայացնելով կառույցի հետագա գործունեության տեսլականը:
Հյուրերը Տիգրան Գալստյանի ուղեկցությամբ շրջել են Ազգային ժողովի շենքում, եղել նիստերի դահլիճում, այցելել խորհրդարանի թանգարան:
Այս մասին տեղեկացնում են ՀՀ Ազգային ժողովի պաշտոնական կայքից։
